អង្គការជំនួយ គាំទ្រដោយសហរដ្ឋអាមេរិក និងអ៊ីស្រាអែល ដែលចែកចាយគ្រឿងផ្គត់ផ្គង់នៅតំបន់ហ្កាហ្សា បានបើកឡើងវិញនូវទីតាំងចំនួនពីររបស់ខ្លួន កាលពីថ្ងៃព្រហស្បតិ៍ (០៥ មិថុនា) រយៈពេលមួយថ្ងៃបន្ទាប់ពីការបញ្ឈប់ការងារជាបណ្ដោះអាសន្ន ដោយសារតែការបាញ់ប្រហារដ៏បង្ហូរឈាមសម្លាប់មនុស្សរាប់សិបនាក់ ជាបន្តបន្ទាប់នៅជិតប្រតិបត្តិការរបស់ខ្លួន។

មូលនិធិមនុស្សធម៌ហ្កាហ្សា GHF ដែលមានមូលដ្ឋាននៅសហរដ្ឋអាមេរិក បាននិយាយថា រថយន្តដឹកទំនិញចំនួន ២៦គ្រឿង នៃស្បៀងអាហារដែលត្រូវការជាចាំបាច់ ត្រូវបានចែកចាយនៅទីតាំងចំនួន២ នៅតំបន់ក្រុង Rafah ភាគខាងត្បូងនៃដែនដីហ្កាហ្សា។

GHF ដែលត្រូវបានរិះគន់យ៉ាងខ្លាំងដោយអង្គការមនុស្សធម៌ រួមទាំងអង្គការសហប្រជាជាតិដែលចោទថាខ្វះអព្យាក្រឹតភាព បានចាប់ផ្តើមចែកចាយជំនួយកាលពីសប្តាហ៍មុន និងបានដំណើរការនៅទីតាំងចំនួនបីនៅដើមសប្តាហ៍នេះ។ នាយកបណ្ដោះអាសន្នរបស់ GHF លោក John Acree បាននិយាយក្នុងសេចក្តីថ្លែងការណ៍មួយថា ក្រុមនេះចង់បើកទីតាំងបន្ថែមទៀត រួមទាំងនៅភាគខាងជើងហ្កាហ្សា និង "ធានាឱ្យមានការផ្តល់ជំនួយសង្គ្រោះជីវិតប្រកបដោយសុវត្ថិភាព និងប្រសិទ្ធភាពជាងមុន"។



អង្គការសហប្រជាជាតិ បានព្រមានថា ភាគច្រើននៃប្រជាជន ២,៣លាននាក់នៅហ្កាហ្សា ប្រឈមនឹងគ្រោះទុរ្ភិក្ស បន្ទាប់ពីអ៊ីស្រាអែល បានបិទច្រកចេញចូលរយៈពេល ១១សប្តាហ៍ ជាមួយនឹងអត្រានៃកុមារតូចៗដែលទទួលរងពីកង្វះអាហារូបត្ថម្ភធ្ងន់ធ្ងរ កើនឡើងជិត ៣ដង៕