ការវាយប្រហារតាមអាកាសជាបន្តបន្ទាប់របស់អ៊ីស្រាអែល បានវាយប្រហារតំបន់ជាយក្រុងភាគខាងត្បូងទីក្រុងបេរូត កាលពីយប់ថ្ងៃព្រហស្បតិ៍ ទី៥ ខែមិថុនា បន្ទាប់ពីយោធាបាននិយាយថា ខ្លួននឹងកំណត់គោលដៅលើរោងចក្រផលិតយានដ្រូនរបស់ក្រុមហេសបូឡា នៅក្រោមដី។

ផ្សែង ត្រូវបានគេមើលឃើញ ហុយចេញពីរដ្ឋធានីប្រទេសលីបង់ ភ្លាមៗបន្ទាប់ពីមនុស្សមួយចំនួនធំបានភៀសខ្លួនចេញពីតំបន់នោះ ដោយបានធ្វើឲ្យផ្លូវកកស្ទះចរាចរណ៍។ ទីភ្នាក់ងារសារព័ត៌មានរបស់ប្រទេសលីបង់ ANI បានរាយការណ៍ថា សារព័ត៌មាននេះ បានរាប់ចំនួនការវាយប្រហារមានចំនួនជិតដប់លើក រួមទាំងការវាយប្រហារពីរលើក មាន«កម្លាំងខ្លាំង»។ យោធាអ៊ីស្រាអែលបាននិយាយនៅក្នុងសេចក្តីថ្លែងការណ៍នៅលើបណ្តាញ Telegram ថា «បច្ចុប្បន្ន កងកម្លាំងការពារអ៊ីស្រាអែល កំពុងវាយប្រហារគោលដៅភេរវកម្មនៃអង្គភាពអាកាសរបស់ក្រុមហេបូឡា។ អ្នកនាំពាក្យភាសាអារ៉ាប់របស់កងកម្លាំងអ៊ីស្រាអែល លោក Avichay Adraee បានព្រមាននៅលើបណ្តាញផ្សព្វផ្សាយសង្គមថា ពលរដ្ឋនៅតំបន់ជាយក្រុង «មានទីតាំងនៅជិតរោងចក្រដែលជាកម្មសិទ្ធិរបស់អង្គការភេរវកម្មហេសបូឡា ត្រូវតែជម្លៀសខ្លួនចេញជាបន្ទាន់។

នៅក្នុងសេចក្តីថ្លែងការណ៍ដាច់ដោយឡែកមួយ យោធាបាននិយាយថា ខ្លួននឹងវាយប្រហារក្នុងពេលឆាប់ៗនេះលើទីតាំងហេដ្ឋារចនាសម្ព័ន្ធផលិតយានដ្រូន(UAV) ក្រោមដី ដែលត្រូវបានបង្កើតឡើងដោយចេតនានៅក្នុងចំណោមប្រជាជនស៊ីវិលនៅក្នុងទីក្រុងបេរូត។ អ្នកសម្របសម្រួលពិសេសរបស់អង្គការសហប្រជាជាតិប្រចាំប្រទេសលីបង់ បានសរសេរនៅលើបណ្តាញ X ថា ការវាយប្រហារនេះ «បង្កើតការភ័យខ្លាច និងការព្រួបារម្ភជាថ្មី» និងបានអំពាវនាវឱ្យ «បញ្ឈប់សកម្មភាពណាមួយដែលអាចបំផ្លាញបន្ថែមទៀតដល់ការបញ្ឈប់អរិភាព»។ ប្រធានាធិបតីលីបង់លោក ចូសេហ្វ អោន(Joseph Aoun) នៅក្នុងសេចក្តីថ្លែងការណ៍បាន «ថ្កោលទោសយ៉ាងម៉ឺងម៉ាត់ចំពោះការឈ្លានពានរបស់អ៊ីស្រាអែល» និង «ការរំលោភយ៉ាងខ្លាំង» លើបទឈប់បាញ់ថ្ងៃទី២៧ ខែវិច្ឆិកា នៅមុនថ្ងៃបុណ្យសាសនាដ៏ពិសិដ្ឋ ជាថ្ងៃឈប់សម្រាករបស់ពលរដ្ឋមូស្លីមនៃបុណ្យ Eid al-Adha ។