ទីផ្សារភាគហ៊ុន អាស៊ី-ប៉ាស៊ីហ្វិក ភាគច្រើនបានហក់ឡើង ខណៈក្រុមវិនិយោគិនបានវាយតម្លៃជំនួបតាមទូរស័ព្ទរវាងប្រធានាធិបតីអាមេរិកDonald Trump និងប្រធានាធិបតីចិនលោកXi Jinping។

លោក Trump និងលោក Xi បានជជែកគ្នាកាលពីថ្ងៃព្រហស្បតិ៍សប្ដាហ៍នេះ ហើយបានព្រមព្រៀងគ្នាថា មន្ត្រីមកពីសហរដ្ឋអាមេរិក និងចិននឹងជួបប្រជុំគ្នាក្នុងពេលឆាប់ៗនេះ ដើម្បីបន្តការចរចាក្នុងគោលបំណងបញ្ចប់សង្រ្គាមពាណិជ្ជកម្មដែលកំពុងបន្ត។

ទន្ទឹមនឹងមានការមើលឃើញពីភាពធូរស្រាលបន្តិច សន្ទស្សន៍ភាគហ៊ុន Nikkei 225 របស់ប្រទេសជប៉ុនបានកើនឡើង០,៣១ % ហើយភាគហ៊ុន Topix បានកើនឡើង ០,៤.%។ ភាគហ៊ុន Kospi របស់កូរ៉េខាងត្បូង បានងើបឡើងដល់១,៤៩% ហើយភាគហ៊ុន Kosdaq បានហក់ឡើងចំនួន០,៨% ។

ចំណែក សន្ទស្សន៍ភាគហ៊ុន S&P/ASX 200 របស់អូស្រ្តាលីវិញ មានការកើនឡើងជាង០,១៦%។

រីឯសន្ទស្សន៍ភាគហ៊ុន Hang Seng របស់ទីក្រុងហុងកុងឯណោះវិញ បានធ្លាក់ចុះ០,១៨%ក្នុងពេលបើកជួញដូរ ស្របពេលភាគហ៊ុន CSI 300 របស់ប្រទេសចិនដីគោកបានធ្លាក់ចុះដែរ។

ជាមួយគ្នានោះ ផ្សារភាគហ៊ុនអាមេរិកវិញក៏បានធ្លាក់ចុះដែរកាលពីថ្ងៃព្រហស្បតិ៍ សប្ដាហ៍នេះ ខណៈភាពតានតឹងរវាងប្រធានាធិបតីលោក Trump និងអគ្គនាយកក្រុមហ៊ុនផលិតរថយន្តអគ្គិសនី Tesla លោក Elon Musk បានជះស្រមោលលើជំនួបតាមទូរស័ព្ទរវាងមេដឹកនាំអាមេរិកនិងចិន ។ 

ភាគហ៊ុនឧស្សាហកម្ម Dow Jones បានធ្លាក់ចុះជិត០,៣% ។ ភាគហ៊ុន S&P 500 បានធ្លាក់ជាង០,៥% ហើយភាគហ៊ុនរបស់ក្រុមហ៊ុនបច្ចេកវិទ្យា Nasdaq Composite បានធ្លាក់ចុះជាង០,៨% ៕