អាជ្ញាធរប្រទេសកាតេម៉ាឡា បានបញ្ជាឱ្យមានការជម្លៀសប្រជាជនជាការបង្ការ នៅក្នុងសហគមន៍នានានៅក្បែរភ្នំភ្លើង Fuego កាលពីថ្ងៃព្រហស្បតិ៍ ទី៥ ខែមិថុនា បន្ទាប់ពីភ្នំភ្លើងបានព្រួសផេះ និងបញ្ចេញកម្អែ កើនឡើង ដែលត្រូវបានគេរំពឹងថានឹងបន្តកើតមានរយៈពេលច្រើនម៉ោង។

យោងតាមវិទ្យាស្ថានជាតិរញ្ជួយដី ភ្នំភ្លើង ឧតុនិយម និងជលសាស្ត្រ បានឱ្យដឹងថា ភ្នំភ្លើងនេះ បានផ្ទុះឡើងកាលពីល្ងាចថ្ងៃពុធ ទី៤ ខែមិថុនា ដោយបានព្រួសផេះ និងសារធាតុដ៏ក្តៅ។ សកម្មភាពភ្នំភ្លើងនេះក៏បានបញ្ជូនកម្អែភ្នំភ្លើង និងលំហូរសារធាតុក្តៅ រហូតដល់៧គីឡូម៉ែត្រ ហើយផេះបានហុយឡើង ដល់៦.០០០ម៉ែត្រខាងលើនីវ៉ូទឹកសមុទ្រ។

ក្នុងការឆ្លើយតប រដ្ឋាភិបាលបានចេញការព្រមានពណ៌លឿងទុំ និងបានជម្លៀសប្រជាជនពីទីក្រុងនានានៅជុំវិញនោះ ទៅកាន់ទីជម្រកចំនួនបួនកន្លែង។ អ្នកសម្របសម្រួលសម្រាប់ការកាត់បន្ថយគ្រោះមហន្តរាយជាតិរបស់ប្រទេសកាតេម៉ាឡា បានជូនដំណឹងថា មនុស្សជាង៥០០នាក់ ត្រូវបានជម្លៀសចេញពីលំនៅឋានរបស់ពួកគេទៅកាន់ទីជម្រក។

ពពកផេះ អាចឡើងដល់កម្ពស់ពី៣.០០០ទៅ ៧.០០០ម៉ែត្រ ដែលអាចធ្វើឲ្យប៉ះពាល់ដល់ការធ្វើចរាចរណ៍ផ្លូវអាកាស។ ជាមួយគ្នានេះ ក្រសួងអប់រំបានប្រកាសផ្អាកថ្នាក់រៀនជាច្រើន នៅក្នុងតំបន់។