ប្រទេសកូរ៉េខាងជើង បានដាក់ដំណើរនាវាចម្បាំងមួយគ្រឿង រយៈពេលពីរសប្តាហ៍បន្ទាប់ពីនាវានោះត្រូវបានខូចខាត ក្នុងអំឡុងពេលប៉ុនប៉ងដាក់ដំណើរការលើកមុន នៅក្នុងឧប្បត្តិហេតុមួយដែលទាក់ទាញការរិះគន់យ៉ាងខ្លាំងពីមេដឹកនាំប្រទេសគឺលោក Kim Jong Un។

ទីភ្នាក់ងារសារព័ត៌មានរដ្ឋ KCNA បាននិយាយនៅថ្ងៃសុក្រ (០៦ មិថុនា) នេះថា នាវាពិឃាតទម្ងន់ ៥.០០០តោន ដែលត្រូវបានស្ដារតុល្យភាពឡើងវិញកាលពីដើមសប្តាហ៍នេះ ត្រូវដាក់ឱ្យដំណើរការជាថ្មីក្នុងថ្ងៃព្រហស្បតិ៍ម្សិលមិញ ហើយឥឡូវនេះ កំពុងចតនៅកំពង់ផែមួយ។ KCNA បានបន្ថែមថា នាវានេះត្រូវបានរំពឹងថានឹងជួសជុលរួចឡើងវិញយ៉ាងពេញលេញ នៅមុនពេលកិច្ចប្រជុំរបស់គណបក្សកាន់អំណាចនៅខែនេះ។

លោក Kim ដែលបានមើលឃើញដោយផ្ទាល់នូវបរាជ័យនាវាចម្បាំងក្នុងអំឡុងពេលការប៉ុនប៉ងដាក់ដំណើរការលើកដំបូងនេះ បានរិះគន់ឧប្បត្តិហេតុនេះថាជា "អំពើឧក្រិដ្ឋកម្ម" ដែល "បានធ្វើឱ្យខូចកិត្តិយស និងមោទនភាពរបស់ប្រទេស" យ៉ាងធ្ងន់ធ្ងរ។ លោកនិយាយថា នោះគឺជាលទ្ធផលនៃ "ការធ្វេសប្រហែស ភាពមិនទទួលខុសត្រូវ និង ភាពមិនច្បាស់លាស់ខាងវិទ្យាសាស្ត្រ"។

ក្រុមអ្នកវិភាគមួយចំនួនមើលឃើញថា ការឆ្លើយតបយ៉ាងរហ័ស និងម៉ឺងម៉ាត់របស់លោក Kim ចំពោះការដាក់ដំណើរការដែលបរាជ័យលើកមុននេះ គឺជាសញ្ញាមួយបង្ហាញថា ទីក្រុងព្យុងយ៉ាង នឹងបន្តពង្រឹងសមត្ថភាពយោធារបស់ខ្លួន៕