ប្រធានក្រុមហាម៉ាស នៅតំបន់ហ្កាហ្សា លោក Khalil al-Hayya បាននិយាយនៅក្នុងសុន្ទរកថាថតទុកជាមុន កាលពីថ្ងៃព្រហស្បតិ៍ (០៥ មិថុនា) ថា ក្រុមប៉ាឡេស្ទីនមួយនេះមិនបានច្រានចោលសំណើចុងក្រោយរបស់សហរដ្ឋអាមេរិក សម្រាប់បទឈប់បាញ់ជាមួយអ៊ីស្រាអែល នៅហ្កាហ្សាទេ ប៉ុន្តែទាមទារឱ្យមានការកែប្រែផ្លាស់ប្តូរ ដែលនឹងធានាដល់ការបញ្ចប់សង្គ្រាមនៅក្នុងដែនដីហ៊ុព័ទ្ធ។

លោកបន្ថែមថា ក្រុមហាម៉ាស បានត្រៀមខ្លួនរួចជាស្រេចក្នុងការចូលរួមក្នុងកិច្ចចរចាបទឈប់បាញ់ថ្មី ហើយការទំនាក់ទំនងជាមួយបណ្តាប្រទេសសម្របសម្រួលក៏កំពុងបន្តផងដែរ។ គួរឱ្យដឹងថា សំណើចុងក្រោយរបស់សហរដ្ឋអាមេរិកនោះ គឺបានធ្វើឡើងតាមរយៈប្រេសិតពិសេសរបស់លោកប្រធានាធិបតី Donald Trump គឺលោក Steve Witkoff ដែលបានហៅការទាមទារកែប្រែរបស់ក្រុមហាម៉ាស ថាមិនអាចទទួលយកបាន។

លោក Hayya បានបញ្ជាក់ជាថ្មីពីការទាមទារឱ្យបញ្ចប់សង្គ្រាម និងការដកទ័ពអ៊ីស្រាអែលចេញពីតំបន់ហ្កាហ្សា នៅក្នុងលក្ខខណ្ឌដែលអ៊ីស្រាអែល បានច្រានចោល។ នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលថ្ងៃទី៣១ ខែឧសភាថា ខណៈរដ្ឋាភិបាលរបស់លោកបានយល់ព្រមលើគម្រោងរបស់លោក Witkoff ក្រុមហាម៉ាសបែរជាកំពុងបន្តបដិសេធទៅវិញ។

សំណើចុងក្រោយនេះរំពឹងថានឹងមានបទឈប់បាញ់ ៦០ថ្ងៃ និងការដោះដូរចំណាប់ថ្នូរ ២៨នាក់ ក្នុងចំណោមអ្នកទាំង ៥៦នាក់ដែលនៅតែឃុំខ្លួនក្នុងតំបន់ហ្កាហ្សា ដោះដូរនឹងអ្នកទោស និងអ្នកជាប់ឃុំប៉ាឡេស្ទីនជាង ១.២០០នាក់ រួមជាមួយនឹងការបញ្ចូលជំនួយមនុស្សធម៌ទៅក្នុងដែនដីហ្កាហ្សា៕