សន្ទស្សន៍ភាគហ៊ុនរបស់ក្រុមហ៊ុនរថយន្ត Tesla បានដាំក្បាលក់ចុះក្នុងទន្លាក់សេរី កាលពីថ្ងៃព្រហស្បតិ៍ (០៥ មិថុនា) ខណៈលោកប្រធានាធិបតីអាមេរិក Donald Trump មានជម្លោះជាសាធារណៈយ៉ាងជូរចត់ជាមួយប្រធានក្រុមហ៊ុនផលិតរថយន្តអគ្គិសនីមួយនេះ គឺលោកមហាសេដ្ឋី Elon Musk ដែលធ្លាប់ប្រកាសដាក់ខ្លួនថាជា "មិត្តទីមួយ"។

វិនិយោគិន បានតាមដានភាពរកាំរកូស ដែលលាតត្រដាងជាមួយនឹងការព្រួយបារម្ភកាន់តែខ្លាំងឡើងសម្រាប់អាណាចក្រអាជីវកម្មរបស់លោក Musk ។ ភាគហ៊ុនរបស់ក្រុមហ៊ុនផលិតរថយន្តនេះ បានធ្លាក់ ១៤% ដោយបានបាត់បង់តម្លៃទីផ្សារចំនួន ១៥០ពាន់លានដុល្លារក្នុងមួយថ្ងៃ ជាប្រវត្តិសាស្រ្ត។

ពាណិជ្ជករបានរុញទម្លាក់ Tesla ដែលរងគ្រោះពីការលក់ធ្លាក់ចុះរួចទៅហើយ ឱ្យចូលក្នុងជ្រោះភាគហ៊ុនកាន់តែជ្រៅ បន្ទាប់ពីលោក Musk បានឆ្លើយតបយ៉ាងរហ័សចំពោះលោក Trump ជាមួយនឹងការបង្ហោះតាមប្រព័ន្ធផ្សព្វផ្សាយសង្គម ដែលបង្កើនការរិះគន់លើសំណើកាត់ពន្ធរបស់ប្រធានាធិបតីអាមេរិករូបនេះ។ លោក Trump វាយបកវិញដោយចោទថា លោក Musk មិនសប្បាយចិត្តដោយសារតែសំណើនោះដកអត្ថប្រយោជន៍ពន្ធ សម្រាប់ការទិញរថយន្តអគ្គិសនីរបស់លោក។

ការឈ្លោះប្រកែកគ្នាដោយបើកចំហជាមួយលោក Trump អាចបង្កើតឧបសគ្គជាច្រើនសម្រាប់ Tesla និងអាណាចក្រជំនួញដ៏ធំទូលាយរបស់លោក Musk ។ ក្រសួងដឹកជញ្ជូនអាមេរិក កំពុងធ្វើនិយ័តកម្មស្តង់ដាររចនារថយន្ត ហើយនឹងមានអំណាចសម្រេចថា តើក្រុមហ៊ុន Tesla អាចផលិតរថយន្តឈ្នួលតាក់ស៊ីបើកដោយខ្លួនឯង ក្នុងទ្រង់ទ្រាយធំបានទៀតឬយ៉ាងណា ហើយចំណុចនេះជាការវាយប្រហារដ៏ធំលើមហាសេដ្ឋីរូបនេះ៕