ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធ បានថ្កោលទោសការបន្តឃុំខ្លួនដោយក្រុម ហ៊ួទី នៅក្នុងប្រទេសយេម៉ែននូវបុគ្គលិកUN បុគ្គលិកជំនួយ និងតំណាងសង្គមស៊ីវិល ហើយបានអំពាវនាវឲ្យ មានការដោះលែងពួកគេជាបន្ទាន់ និងដោយគ្មានលក្ខខណ្ឌ។

នៅក្នុងសេចក្តីថ្លែងការណ៍មួយដែលប្រារព្ធខួបមួយឆ្នាំនៃការឃុំឃាំងដែលបានចាប់ផ្តើម នៅក្នុងខែមិថុនា ឆ្នាំ ២០២៤ សមាជិកក្រុមប្រឹក្សានេះ បានសម្តែងការព្រួយបារម្ភយ៉ាងខ្លាំងចំពោះការចាប់ខ្លួននាពេលថ្មីៗនេះ និងការឃុំឃាំងដ៏យូរនូវបុគ្គលិកមកពីអង្គការសហប្រជាជាតិ អង្គការមិនមែនរដ្ឋាភិបាលជាតិ និងអន្តរជាតិ និងបេសកកម្មការទូត។

ពួកគេក៏បានថ្កោលទោសចំពោះការស្លាប់របស់បុគ្គលិកកម្មវិធីអាហារពិភពលោក នៅក្នុងមន្ទីរឃុំឃាំងរបស់ក្រុមហ៊ួទី កាលពីថ្ងៃទី ១០ ខែកុម្ភៈ។

សមាជិកក្រុមប្រឹក្សានេះ បាននិយាយថា ពិធីបុណ្យសាសនាមូស្លីម Eid Al-Adha ដែលបានចាប់ផ្តើមនៅល្ងាចថ្ងៃព្រហស្បតិ៍ នឹងមានការឈឺចាប់យ៉ាងខ្លាំងសម្រាប់អ្នកដែលត្រូវបានឃុំខ្លួន និងក្រុមគ្រួសាររបស់ពួកគេ ហើយពួកគេបានព្រមានថា ការចាប់ពង្រត់បន្តបង្កើតការភ័យខ្លាច ក្នុងចំណោមអ្នកធ្វើការផ្នែកមនុស្សធម៌។

ពួកគេបានបន្ថែមថា ការគំរាមកំហែងដល់អ្នកជួយផ្តល់ជំនួយគឺ «មិនអាចទទួលយកបាន» ហើយធ្វើឲ្យ វិបត្តិមនុស្សធម៌ដ៏ធ្ងន់ធ្ងររួចទៅហើយនៅក្នុងប្រទេសយេម៉ែន កាន់តែអាក្រក់ឡើងៗ។

ក្រុមប្រឹក្សាដែលមានសមាជិកចំនួន ១៥ប្រទេស បានអំពាវនាវឲ្យក្រុមហ៊ួទី គោរពគោលការណ៍នៃច្បាប់មនុស្សធម៌អន្តរជាតិ រួមទាំងលក្ខខណ្ឌនៃលទ្ធភាពធ្វើដំណើរដោយសុវត្ថិភាព ដ៏ឆាប់រហ័ស និងគ្មានការរារាំង» ដើម្បីអនុញ្ញាតឲ្យជំនួយមនុស្សធម៌ ទៅដល់ជនស៊ីវិលដែលកំពុងត្រូវការ។