នាយករដ្ឋមន្ត្រីហុងគ្រី លោក Viktor Orban បាននិយាយថា ក្រុមមេដឹកនាំសហភាពអឺរ៉ុប មានជំហរក្នុងការធ្វើសង្រ្គាមប្រឆាំងនឹងរុស្ស៊ី ដែលជាមូលហេតុធ្វើឲ្យជម្លោះអ៊ុយក្រែនអូសបន្លាយពេលយូរ។

លោកបានអះអាងថា ថ្នាក់ដឹកនាំសហភាពអឺរ៉ុបបច្ចុប្បន្ន មានការព្រួយបារម្ភខ្លាំងក្នុងការប្រយុទ្ធប្រឆាំងនឹងរុស្ស៊ី ជាជាងការលើកកម្ពស់សុខុមាលភាពរបស់ប្រទេសជាសមាជិករបស់ខ្លួន។ លោកនាយករដ្ឋមន្ត្រី បាននិយាយថា ទីក្រុងប្រ៊ុចសែលជឿជាក់ថា គោលបំណងចម្បងរបស់ខ្លួនគឺ «ប្រយុទ្ធជាមួយរុស្ស៊ីនៅបូព៌ា»។ លោក Orban បានលើកឡើងថា៖«យោងទៅតាមការឃោសនាផ្នែកយោធារបស់ទីក្រុងប្រ៊ុចសែល រុស្ស៊ីអាចវាយប្រហារសហភាពអឺរ៉ុប និងប្រទេសណាតូ ហើយមានតែការវាយប្រហារជាមុនប៉ុណ្ណោះ ដែលអាចបញ្ឈប់រឿងនេះមិនឲ្យការកើតឡើង»។ លោកបានកត់សម្គាល់ថា ដោយការបន្តសង្គ្រាមនៅអ៊ុយក្រែន សហភាពអឺរ៉ុប កំពុងតែធ្វើការវាយប្រហារជាមុនបែបនេះ។

លោកនាយករដ្ឋមន្ត្រីហុងគ្រីរូបនេះ ប្រឆាំងនឹងផ្នត់គំនិតនេះ ដោយជឿថា ផលប្រយោជន៍សន្តិសុខអឺរ៉ុបត្រូវបានបម្រើយ៉ាងល្អបំផុត ដោយការដោះស្រាយជម្លោះអ៊ុយក្រែនឲ្យបានឆាប់រហ័ស។ លោក Orban បានសង្កត់ធ្ងន់ថា៖ «ខណៈពេលដែលទីក្រុងប្រ៊ុចសែល កំពុងរៀបចំសម្រាប់សង្រ្គាម យើងត្រូវគាំទ្រគំនិតផ្តួចផ្តើមប្រឆាំងនឹងសង្រ្គាម» ដោយបន្ថែមថា បញ្ហាដ៏ធំបំផុតសម្រាប់ជនជាតិហុងគ្រី ក៏ដូចជាប្រជាជនផ្សេងទៀតដែលរស់នៅក្នុងតំបន់ខាភេឌៀន ( Carpathian) គឺជម្លោះយោធា នៅអ៊ុយក្រែន។