រដ្ឋមន្ត្រីការបរទេសអាល្លឺម៉ង់ លោក Johann Wadephul កាលពីថ្ងៃព្រហស្បតិ៍ (ទី៥ ខែមិថុនា) បាននិយាយថា ការទទួលស្គាល់រដ្ឋប៉ាឡេស្ទីន នាពេលនេះ នឹងជាការផ្ដល់នូវ «សញ្ញាខុស»។

អំឡុងពេលនិយាយនៅឯសន្និសីទសារព័ត៌មាន ក្នុងទីក្រុងប៊ែរឡាំងជាមួយសមភាគីអ៊ីស្រាអែល គឺលោក Gideon Saar លោក Wadephul បានលើកឡើងថា៖ «ការចរចា រវាងអ៊ីស្រាអែល និងប៉ាឡេស្ទីន ត្រូវតែបញ្ចប់ជាមុនសិន មុននឹងទទួលស្គាល់រដ្ឋប៉ាឡេស្ទីនជាផ្លូវការ»។

គួរបញ្ជាក់ថា ប្រទេសអេស្ប៉ាញ អៀរឡង់ និងន័រវេស កាលពីឆ្នាំមុន បានទទួលស្គាល់រដ្ឋប៉ាឡេស្ទីន ហើយថ្មីៗនេះ ប្រធានាធិបតីបារាំង លោក Emmanuel Macron បានបង្កើនការគាំទ្ររបស់លោក ចំពោះគំនិតនេះ ដែលនាំឲ្យអ៊ីស្រាអែលចោទប្រកាន់រូបលោកថា «ចូលរួមចលនាប្រឆាំងនឹងរដ្ឋជ្វីហ្វ»។

កាលពីសប្តាហ៍មុន រដ្ឋមន្ត្រីការពារជាតិអ៊ីស្រាអែល លោក Israel Katz បានប្តេជ្ញាថា នឹងបង្កើត «រដ្ឋជ្វីហ្វអ៊ីស្រាអែល» នៅតំបន់កាន់កាប់ West Bank ដោយការលើកឡើងនោះកើតមានក្រោយមួយថ្ងៃបន្ទាប់ពីរដ្ឋាភិបាលបានប្រកាសសាងសង់ការតាំងទីលំនៅថ្មីចំនួន ២២កន្លែង នៅក្នុងដែនដីប៉ាឡេស្ទីន។

នៅថ្ងៃព្រហស្បតិ៍នោះ លោក Wadephul បាននិយាយថា លោកមានការព្រួយបារម្ភ អំពីស្ថានភាពតានតឹងខ្លាំង នៅតំបន់ West Bank ហើយថា រដ្ឋាភិបាលអាល្លឺម៉ង់ «មិនគាំទ្រ» ការសាងសង់ការតាំងទីលំនៅថ្មីរបស់អ៊ីស្រាអែលនៅទីនោះឡើយ ដោយចាត់ទុកថា ខុសច្បាប់ក្រោមច្បាប់អន្តរជាតិ។ 

ពាក់ព័ន្ធនឹងសង្រ្គាម នៅតំបន់ហ្កាហ្សា លោកក៏បានលើកឡើងផងដែរថា ជំនួយ «តិចតួចពេក» កំពុងទៅដល់ជនស៊ីវិល នៅក្នុងដែនដីហែកហួរដោយសង្រ្គាម ដែលអង្គការសហប្រជាជាតិ បានព្រមានកាលពីខែមុនថា ប្រជាជនទទាំងអស់ប្រឈមនឹងគ្រោះទុរ្ភិក្ស៕