ស្នងការសហភាពអឺរ៉ុប (EU)ទទួលបន្ទុកកិច្ចការសមុទ្រមេឌីទែរ៉ាណេដែលកំពុងទស្សនកិច្ច លោកស្រី Dubravka Suica បាននិយាយកាលពីថ្ងៃព្រហស្បតិ៍ថា កញ្ចប់ថវិកា ១៧៥ លានអឺរ៉ូ (ជិត ១៨៣ លានដុល្លារ) សម្រាប់ប្រទេសស៊ីរី គឺជា «សារដ៏ច្បាស់»នៃការគាំទ្រដល់ការកសាងឡើងវិញ។

លោកស្រី Suica បានប្រកាសកញ្ចប់ថវិកានៅទីក្រុងដាម៉ា( Damascus)កាលពីថ្ងៃពុធ ដោយនិយាយថា ខ្លួននឹងផ្តោតលើវិស័យនានា រួមទាំងថាមពល ការអប់រំ សុខភាព និងកសិកម្ម ជួយកសាងសេដ្ឋកិច្ចរបស់ប្រទេសស៊ីរីឡើងវិញ គាំទ្រស្ថាប័នរបស់ខ្លួន និងលើកកម្ពស់សិទ្ធិមនុស្ស។

លោកស្រី Suica បាននិយាយនៅក្នុងបទសម្ភាសន៍មួយកាលពីថ្ងៃព្រហស្បតិ៍ថា៖«ខ្ញុំបានមកទីនេះ ... ជាមួយនឹងសារច្បាស់លាស់ថា យើងនៅទីនេះ ដើម្បីជួយ និងជួយប្រទេសស៊ីរី ក្នុងការស្តារឡើងវិញ ។

លោកស្រី បាននិយាយនៅក្នុងដំណើរទស្សនកិច្ចលើកដំបូងដោយស្នងការសហភាពអឺរ៉ុប ចាប់តាំងពីរដ្ឋាភិបាលអន្តរកាល ត្រូវបានបង្កើតឡើង កាលពីចុងខែមីនាថា៖«យើងចង់ឲ្យការកសាងឡើងវិញ និងការស្តារឡើងវិញ នឹងគ្រប់គ្រងដោយស៊ីរី និងដឹកនាំដោយស៊ីរី»។

លោកស្រីបានបន្ថែមថា៖ «យើងចង់ឃើញស៊ីរី ក្លាយជាប្រទេសប្រជាធិបតេយ្យធម្មតាមួយ ដែលមានច្បាប់ទម្លាប់ត្រឹមត្រូវ នៅពេលអនាគត»។

ប្រទេសស៊ីរី បាននិងកំពុងស្វែងរកការផ្លាស់ប្តូរមួយដែលមានការយកចិត្តទុកដាក់ និងប្រុងប្រយ័ត្ន ចាប់តាំងពីលោក បាសា អាល់អាសាដ (Bashar al-Assad) ត្រូវបានបណ្តេញចេញពីអំណាច ក្នុងខែធ្នូ បន្ទាប់ពីសង្គ្រាមស៊ីវិលជិត ១៤ឆ្នាំ។

សហភាពអឺរ៉ុប បានប្រកាសកាលពីខែមុនថា ខ្លួននឹងដកទណ្ឌកម្មសេដ្ឋកិច្ចលើប្រទេសស៊ីរី ក្នុងគោលបំណងជួយដល់ការស្តារឡើងវិញរបស់ខ្លួន។