សារព័ត៌មានក្នុងស្រុក រាយការណ៍ថា នគរបាលនៅទីក្រុងភាគខាងត្បូង Bengaluru ប្រទេសឥណ្ឌា បានចាប់ខ្លួនមនុស្ស ៤នាក់ ក្រោយហេតុការណ៍ជាន់គ្នា អំឡុងពិធីលើកពាន Indian Premier Leagueរបស់ក្រុមគ្រីកឃីត Royal Challengers Bengaluru (RCB) ដែលបានសម្លាប់មនុស្ស ១១នាក់ និងមនុស្ស ៤៧នាក់ផ្សេងទៀត រងរបួស ។

សារព័ត៌មានក្នុងស្រុករាយការណ៍បន្តថា មនុស្ស ៣នាក់ មកពីក្រុមហ៊ុនគ្រប់គ្រងព្រឹត្តការណ៍ ហើយមន្រ្តីម្នាក់មកពីក្រុម RCB ត្រូវបានចាប់ខ្លួន នៅថ្ងៃសុក្រនេះ ។

សារព័ត៌មាន India Today រាយការណ៍ថា លោក Nikhil Sosale គឺជាប្រធានផ្នែកទីផ្សាររបស់ក្រុម RCB ត្រូវបានចាប់ខ្លួននៅអាកាសយានដ្ឋានក្រុង Bengaluru ។

ចំណែកឯកាសែត Indian Express រាយការណ៍ថា លោក Sosale ត្រូវបានចាប់ខ្លួនជាមួយមន្រ្តីប្រតិបត្តិម្នាក់មកពីក្រុមហ៊ុនរៀបចំព្រឹត្តការណ៍ ។ នៅមិនទាន់មានសេចក្តីអត្ថាធិប្បាយភ្លាមៗនោះទេពីក្រុម RCB ។

គួរឲ្យដឹងថា មនុស្សរាប់ម៉ឺននាក់ បានប្រមូលផ្តុំគ្នានៅតាមដងផ្លូវ ក្នុងរដ្ឋភាគខាងត្បូង Karnataka ប្រទេសឥណ្ឌា ដើម្បីស្វាគមន៍ការវិលត្រឡប់មកវិញរបស់វីរបុរសពួកគេគឺកីឡាករ Virat Kohli និងក្រុម RCB របស់គាត់ ក្រោយពួកគេយកឈ្នះក្រុម Punjab Kings នៅវគ្គផ្តាច់ព្រ័ទ្រនៃព្រឹត្តការណ៍គ្រីកឃីត Indian Premier League ៕