​ប្រណាំង​យានយន្ត៖ ​កីឡាការិនី Merce Marti និង​ជំនួយការ Margot Llobera នឹង​បង្កើត​ប្រវត្តិសាស្ត្រ​ថ្មី​នៅ​ខែមករា​ខាងមុខនេះ ជា​ក្រុម​កីឡាការិនី​ប្រណាំង​យានយន្ត​ដំបូង ​ដែល​ចូលរួម​ព្រឹត្តិការណ៍​ប្រណាំង​យានយន្ត​ចំងាយ​ឆ្ងាយ Dakar Rally​។ ​​កីឡាការិនី​ទាំងពីរ​នឹង​ប្រឡូក​ការប្រកួត Rally ដែល​លំបាក​បំផុត​នៅលើ​លោកជាមួយនឹង​ក្រុម​ប្រណាំង FN Speed Team ដែល​ក្រុម​នេះ​គ្រប់ផ្នែក​ទាំងអស់​សុទ្ធតែ​ជា​ស្ត្រី​។

​Marti និង​ជំនួយ Llobera នឹង​ជា​ក្រុមកីឡា​ការិនី​ដំបូង​ក្នុង​រយៈពេល ៤៤ឆ្នាំ​នៃ​ប្រវត្តិសាស្ត្រ Dakar Rally​។ ​តាមពិតទៅ Merce Marti ដំបូង​ហាត់​បើកបរ​យន្តហោះ​ទេ​គឺ​តាំងពី​អាយុ ១៧ឆ្នាំ​ម្ល៉េះ តែ​ពាក់ព័ន្ធ​នឹង​យានយន្ត​នាង​ចូលចិត្ត​ទាំងអស់ ហើយ​នាង​បាន​ពុះពារ​រហូត​សំរេចបំណង​មួយ​នេះ​ទៀត​។ ​​ភាព​ផ្សងព្រេង​ជា​អ្នកកីឡាក៏បាន​ធ្វើឱ្យ Marce Marti ត្រូវបាន​ដាក់បញ្ចូល​ក្នុងចំណោម​អត្ត​ព​លិ​ក​អេ​ស្ប៉ា​ញ​ទាំង ១០០ ដែល​បាន​ពុះពារ​ដើម្បី​សំរេច​សមិទ្ធផល​។ ​Llobera និង Merce Marti នឹង​ចាកចេញ​ទៅកាន់​ទឹកដី​អារ៉ាប៊ីសាអ៊ូឌីត​នៅ​ថ្ងៃទី២៧ ខែធ្នូ​នេះ ខណៈ​ការប្រកួត​នឹង​ចាប់ផ្តើម​ពីថ្ងៃ​ទី១ ដល់​ថ្ងៃទី១៤ ខែមករា​។ ​ការប្រកួត​មាន​សរុប ១២ដំណាក់កាល​ចេញដំណើរ និង​បញ្ចប់​នៅទីក្រុង Jeddah ប្រទេស​អារ៉ាប៊ីសាអ៊ូឌីត​៕

​អត្ថបទ​៖​នាង សុភា​វុ​ធ