ប្រមុខស្ថាប័ននយោបាយខ្ពស់បំផុតរបស់សហភាពអឺរ៉ុប (EU) នៅថ្ងៃសុក្រ (ទី៦ ខែមិថុនា) នេះ បានប្រាប់ឲ្យដឹងថា ប្លុកគាំទ្រយ៉ាងម៉ឺងម៉ាត់ ចំពោះតុលាការព្រហ្មទណ្ឌអន្តរជាតិ (ICC) បន្ទាប់ពីរដ្ឋបាលរបស់ប្រធានាធិបតីអាមេរិក លោក Donald Trump បានដាក់ទណ្ឌកម្មលើចៅក្រម ៤រូប នៅក្នុងតុលាការនេះ។

លោក Antonio Costa ប្រធានក្រុមប្រឹក្សាអឺរ៉ុប ដែលតំណាងឲ្យរដ្ឋាភិបាលនៃរដ្ឋសមាជិកទាំង ២៧ បាននិយាយថា តុលាការ គឺជា «មូលដ្ឋានគ្រឹះនៃយុត្តិធម៌អន្តរជាតិ» ហើយបានបញ្ជាក់ថា ឯករាជ្យភាព និងសុចរិតភាពរបស់ស្ថាប័ននេះ ត្រូវតែទទួលបានការការពារ។

លោក Costa បាននិយាយក្រោយមួយថ្ងៃបន្ទាប់ពីក្រុងវ៉ាស៊ីនតោនដាក់ទណ្ឌកម្មលើចៅក្រម ៤រូប នៅ ICC ជាការសងសឹកមិនធ្លាប់មានពីមុនមក ចំពោះការចេញដីកាចាប់ខ្លួននាយករដ្ឋមន្ត្រីអ៊ីស្រាអែល លោក Benjamin Netanyahu និងការសម្រេចកន្លងមក ក្នុងការបើកការស៊ើបអង្កេតលើករណី ដែលត្រូវបានចោទប្រកាន់ថា អាចជាការប្រព្រឹត្តិឧក្រិដ្ឋកម្មសង្រ្គាមដោយទាហានអាមេរិក នៅប្រទេសអាហ្វហ្គានីស្ថាន។

រដ្ឋមន្ត្រីការបរទេសអាមេរិក លោក Marco Rubio បាននិយាយថា៖ «ចៅក្រមដែលត្រូវបានដាក់ទណ្ឌកម្មទាំងនោះ បានចូលរួមយ៉ាងសកម្ម នៅក្នុងវិធានការខុសច្បាប់ និងគ្មានមូលដ្ឋានរបស់ ICC ដែលផ្តោតលើអាមេរិក ឬសម្ព័ន្ធមិត្តជិតស្និទ្ធរបស់យើង គឺអ៊ីស្រាអែល»។

ICC និងរដ្ឋជាសមាជិកមួយចំនួន កំពុងជំរុញឲ្យសហភាពអឺរ៉ុបប្រើប្រាស់លក្ខន្តិកៈទប់ស្កាត់របស់ខ្លួន ដែលហាមឃាត់ក្រុមហ៊ុន EU ណាមួយ កុំឲ្យអនុលោមតាមទណ្ឌកម្មរបស់សហរដ្ឋអាមេរិក ដើម្បីប្រឆាំងនឹងវិធានការនេះ៕