ការិយាល័យរបស់នាយករដ្ឋមន្ត្រីកាណាដា លោក Mark Carney បាននិយាយកាលពីថ្ងៃព្រហស្បតិ៍ថា ប្រទេសកាណាដា និងចិន បានព្រមព្រៀងគ្នាក្នុងការធ្វើឲ្យមានបណ្តាញទំនាក់ទំនងមានភាពប្រក្រតីឡើងវិញ បន្ទាប់ពីទំនាក់ទំនងការទូត មានភាពតានតឹងរវាងប្រទេសទាំងពីរ។

ការិយាល័យនេះ បានឲ្យដឹងនៅក្នុងសេចក្តីថ្លែងការណ៍មួយថា៖«លោក Mark Carney បាននិយាយជាមួយនាយករដ្ឋមន្រ្តីចិនលោក Li Qiang ។ មេដឹកនាំទាំងពីរ បានផ្លាស់ប្តូរទស្សនៈស្តីពីទំនាក់ទំនងទ្វេភាគី រួមទាំងសារៈសំខាន់នៃការចូលរួម ហើយបានយល់ព្រមធ្វើបណ្តាញទំនាក់ទំនងដំណើរការធម្មតាឡើងវិញរវាងកាណាដា និងចិន»។

ពួកគេក៏បានពិភាក្សាអំពីពាណិជ្ជកម្ម និង «បានប្តេជ្ញាឲ្យរដ្ឋាភិបាលរបស់ពួកគេ ធ្វើការរួមគ្នា ដើម្បីដោះស្រាយវិបត្តិ»។

ទំនាក់ទំនងរវាងទីក្រុងប៉េកាំង និងទីក្រុងអូតាវ៉ា មានភាពតានតឹង ក្នុងប៉ុន្មានឆ្នាំថ្មីៗនេះ បន្ទាប់ពីមានការចាប់ខ្លួននាយកប្រតិបត្តិទូរគមនាគមន៍ជាន់ខ្ពស់របស់ចិន តាមដីការបស់សហរដ្ឋអាមេរិក កាលពីឆ្នាំ ២០១៨។

ទីភ្នាក់ងារសារព័ត៌មានស៊ីនហួ បានរាយការណ៍ថា លោក Li បានប្រាប់ Carney ថា «ក្នុងរយៈពេលប៉ុន្មានឆ្នាំចុងក្រោយនេះ ទំនាក់ទំនងចិននិងកាណាដា បានប្រឈមមុខនឹងការរំខាន ដែលមិនចាំបាច់ និងជួបប្រទះការលំបាកយ៉ាងធ្ងន់ធ្ងរ»។