កាលពី ២ខែមុន ក្រុមហ៊ុនផលិតដែកដ៏ធំ British Steel ស្ទើរតែដួលរលំទៅហើយ មុនពេលវាត្រូវបានកាន់កាប់ដោយរដ្ឋាភិបាលរបស់ចក្រភពអង់គ្លេស ជាកិច្ចខិតខំប្រឹងប្រែងចុងក្រោយ ដើម្បីជួយសង្គ្រោះក្រុមហ៊ុននេះ។

នេះបានកើតឡើងបន្ទាប់ពីម្ចាស់ក្រុមហ៊ុនចិន Jingye Group បានប្រកាសថា ឡដុតចំនួន ២ ដែលជាប្រភេទឡចុងក្រោយរបស់ខ្លួន នៅចក្រភពអង់គ្លេស នឹងបិទដំណើរការជារៀងរហូត នៅក្នុងទីក្រុងឧស្សាហកម្មអង់គ្លេស Scunthorpe ដោយធ្វើឲ្យមានហានិភ័យបាត់បង់ការងាររាប់រយកន្លែង។

ចំណាត់ការរបស់រដ្ឋាភិបាលបានគូសបញ្ជាក់ពីភាពលំបាកកាន់តែខ្លាំងឡើង ចំពោះឧស្សាហកម្មដែករបស់ចក្រភពអង់គ្លេស។ ឧស្សាហកម្មនេះកំពុងប្រឈនឹងការផ្គត់ផ្គង់លើសកម្រិតជាសកល និងលក្ខខណ្ឌពាណិជ្ជកម្មមិនច្បាស់លាស់ ជាពិសេសនៅក្នុងទីផ្សារនាំចេញដ៏ធំរបស់ខ្លួន គឺសហរដ្ឋអាមេរិក។

អាមេរិកគឺជាទីផ្សារនាំចេញដែកថែបធំបំផុតជាងគេទី២ របស់ចក្រភពអង់គ្លេស ដែលមានតម្លៃជាង ៤០០លានផោន (៥៤០លានដុល្លារអាមេរិក) ក្នុងមួយឆ្នាំ។ ទោះបីជារដ្ឋាភិបាលអង់គ្លេស បានចុះហត្ថលេខាលើកិច្ចព្រមព្រៀងពាណិជ្ជកម្មជាមួយទីក្រុងវ៉ាស៊ីនតោន កាលពីខែមុន ជាអ្វីដែលមានការសន្យាធ្វើឲ្យអត្រាពន្ធធ្លាក់ចុះដល់កម្រិតសូន្យក៏ដោយ ក៏ក្រុមហ៊ុនផលិតដែករបស់អង់គ្លេស នៅតែតម្រូវឲ្យបង់កម្រិត ២៥ភាគរយលើការនាំចេញទៅកាន់សហរដ្ឋអាមេរិក។ អត្រានេះនឹងនៅតែមានរហូតដល់យ៉ាងហោចណាស់ថ្ងៃទី៩ ខែកក្កដា។

កិច្ចព្រមព្រៀងនេះ បានធ្វើឲ្យចក្រភពអង់គ្លេសគេចផុតជាបណ្ដោះអាសន្នពីអត្រាពន្ធកាន់ខ្ពស់ខ្លាំង ៥០ភាគរយដែលត្រូវបានដាក់លើប្រទេសផ្សេងទៀត ដែលបានចាប់ផ្ដើមកាលពីថ្ងៃពុធ (ទី៤ ខែមិថុនា)។ ប៉ុន្តែតួអង្គក្នុងឧស្សាហកម្មនេះ នៅចក្រភពអង់គ្លេស បានលើកឡើងថា ពួកគេនៅតែប្រឈមជាមួយភាពមិនច្បាស់លាស់ដដែល។

ភាពមិនប្រាកដប្រជានេះកំពុងតែធ្វើឲ្យប៉ះពាល់យ៉ាងធ្ងន់ធ្ងរជាពិសេសដល់វិស័យមួយ ដែលជួបនឹងការលំបាកយ៉ាងខ្លាំងរួចទៅហើយ។ រោងចក្រជាច្រើន នៅអង់គ្លេស មិនបានផលិតដែកអស់រយៈពេលជិតមួយឆ្នាំមកហើយដោយសារតែខ្វះថវិកាទិញសម្ភារៈ។ ផលិតកម្មដែកថែបរបស់ចក្រភពអង់គ្លេស បានធ្លាក់ចុះដល់កម្រិតទាបបំផុត ចាប់តាំងពីទសវត្សរ៍ឆ្នាំ១៩៣០ ដែលជំរុញឲ្យអាជ្ញាធរសន្យាថា នឹងផ្តល់ប្រាក់ចំនួន ៣,៤ពាន់លានដុល្លារ ដើម្បីជួយធ្វើឲ្យឧស្សាហកម្មនេះស្ទុះងើបឡើងវិញ៕