បើយោងតាមអ្នកជំនាញអាកាសចរណ៍យោធាលោកខាងលិច បានឲ្យដឹងថា វានឹងត្រូវចំណាយពេលមិនតិចឆ្នាំនោះឡើយ ដើម្បីឲ្យរុស្ស៊ីប្រឹងប្រែងជំនួសយន្តហោះទម្លាក់គ្រាប់បែកមានសមត្ថភាពបំពាក់នុយក្លេអ៊ែរដែលត្រូវបានវាយប្រហារដោយយានដ្រូនរបស់អ៊ុយក្រែន ដោយបានធ្វើឲ្យកម្មវិធីទំនើបកម្មដែលត្រូវបានពន្យារពេលរួចហើយនោះ ជាប់គាំង។

រូបថតពីផ្កាយរណបនៃអាកាសយានដ្ឋាន នៅស៊ីបេរី និងចុងភាគខាងជើងរបស់រុស្ស៊ី បង្ហាញឲ្យឃើញពីការខូចខាតយ៉ាងធ្ងន់ធ្ងរ ដោយសារការវាយប្រហារថ្មីៗនេះ ដោយយន្តហោះជាច្រើនគ្រឿងត្រូវបានឆេះខ្ទេចទាំងស្រុង ទោះបីជាមានរបាយការណ៍ផ្ទុយគ្នានៃចំនួនសរុបដែលត្រូវបានបំផ្លាញ ឬខូចខាតក៏ដោយ។

សហរដ្ឋអាមេរិកវាយតម្លៃថា យន្តហោះចម្បាំងរហូតដល់ ២០គ្រឿង ត្រូវបានវាយប្រហារ ពោលគឺប្រហែលពាក់កណ្តាលនៃចំនួនប៉ាន់ប្រមាណដោយប្រធានាធិបតីអ៊ុយក្រែន លោក Volodymyr Zelensky ហើយប្រមាណជា ១០គ្រឿង ត្រូវបានបំផ្លាញ។

តែកាលពីថ្ងៃព្រហស្បតិ៍ (ទី៥ ខែមិថុនា) រដ្ឋាភិបាលរុស្ស៊ី បានបដិសេធថា គ្មានយន្តហោះណាមួយត្រូវបានបំផ្លាញឡើយ ហើយបានបញ្ជាក់ថា ការខូចខាតនឹងត្រូវបានជួសជុលឡើងវិញ។ ប៉ុន្តែអ្នកសរសេរប្លុកយោធារុស្ស៊ី បានរៀបរាប់ អំពីការបាត់បង់ ឬការខូចខាតយ៉ាងធ្ងន់ធ្ងរ ចំពោះយន្តហោះប្រហែលជាង ១០គ្រឿង ដោយចោទប្រកាន់មេបញ្ជាការថា មានការធ្វេសប្រហែស។

គួរបញ្ជាក់ថា ការវាយប្រហារដែលត្រូវបានរៀបចំគម្រោងអស់រយៈពេលជាង ១៨ខែ នៅក្នុងប្រតិបត្តិការចារកម្មអ៊ុយក្រែនឈ្មោះ «Spider's Web» និងដែលត្រូវបានធ្វើឡើងដោយយានដ្រូន បានផ្ដល់សារដ៏មានឥទ្ធិពលដល់ប្រទេសដែល ពេញមួយសង្រ្គាមអ៊ុយក្រែន បានរំលឹកពិភពលោកជាញឹកញាប់ អំពីថាមពលនុយក្លេអ៊ែររបស់ខ្លួន។

តែយ៉ាងណាក្ដី ដោយជាក់ស្ដែង អ្នកជំនាញបានលើកឡើងថា ហេតុការណ៍នេះនឹងមិនប៉ះពាល់ខ្លាំងដល់សមត្ថភាពវាយប្រហារនុយក្លេអ៊ែររបស់រុស្ស៊ី ដែលភាគច្រើនមានមីស៊ីលបាញ់ចេញពីដី និងពីនាវាមុជទឹកនោះឡើយ៕