យោធាអ៊ីស្រាអែលបានចេញបញ្ជាជម្លៀសដល់អ្នកស្រុកនៃផ្នែកខ្លះរបស់ទីក្រុងហ្កាហ្សា នាថ្ងៃសុក្រ (ទី៦ ខែមិថុនា) នេះ នៅមុនមានការវាយប្រហារ ខណៈដែលខ្លួនកំពុងបង្កើនយុទ្ធនាការកាន់តែខ្លាំងឡើងៗ នៅក្នុងដែនដីប៉ាឡេស្ទីនដែលរងការបំផ្លិចបំផ្លាញមួយនេះ។

អ្នកនាំពាក្យកងទ័ព លោក Avichay Adraee បានប្រាប់ឲ្យដឹងថា៖ «នេះគឺជាការព្រមានចុងក្រោយ និងបន្ទាន់ មុនពេលមានការវាយប្រហារដែលនឹងកើតឡើង។ កងទ័ពនឹងវាយប្រហារគ្រប់តំបន់ទាំងអស់ ដែលគ្រាប់រ៉ូកែតត្រូវបានបាញ់ចេញមក»។

បទបញ្ជាជម្លៀសនេះកើតមានឡើងនៅថ្ងៃចាប់ផ្ដើមនៃថ្ងៃឈប់សម្រាក Eid al-Adha ដែលជាពិធីបុណ្យសាសនាដ៏សំខាន់មួយនៃប្រតិទិនមូស្លីម។

គួរបញ្ជាក់ថា ថ្មីៗនេះ យោធាអ៊ីស្រាអែលបានបង្កើនយុទ្ធនាការរបស់ខ្លួន នៅតំបន់ហ្កាហ្សា ជាអ្វីដែលខ្លួនផ្ដល់ហេតុផលថា ជាកិច្ចប្រឹងប្រែងថ្មី ដើម្បីកម្ចាត់ក្រុមហាម៉ាសដែលការវាយប្រហាររបស់ខ្លួន កាលខែតុលា ឆ្នាំ២០២៣ បានបង្កឲ្យមានសង្គ្រាមរហូតដល់សព្វថ្ងៃនេះ។ ការអំពាវនាវជាអន្តរជាតិឲ្យព្រមព្រៀងឈានដល់បទឈប់បាញ់ បានកើនឡើងយ៉ាងខ្លាំងក្នុងប៉ុន្មានសប្តាហ៍ថ្មីៗនេះ៕