ការិយាល័យប្រធានាធិបតីកូរ៉េខាងត្បូង បាននិយាយកាលពីថ្ងៃសុក្រ ទី៦ ខែមិថុនា ថា ប្រធានាធិបតីសហរដ្ឋអាមេរិក លោក Donald Trump និងប្រធានាធិបតីថ្មីរបស់ប្រទេសកូរ៉េខាងត្បូង លោក Lee Jae-myung បានព្រមព្រៀងគ្នាដើម្បីធ្វើការឆ្ពោះទៅរកកិច្ចព្រមព្រៀងជុំវិញការដំឡើងពន្ធដ៏ឆាប់រហ័សនៅក្នុងការសន្ទនាតាមទូរស័ព្ទលើកដំបូងរបស់មេដឹកនាំទាំងពីរចាប់តាំងពីមេដឹកនាំគណបក្សប្រជាធិបតេយ្យកូរ៉េខាងត្បូងបានជាប់ឆ្នោត កាលពីដើមសប្តាហ៍នេះ។

លោក Trump បានដាក់ការដំឡើងពន្ធលើប្រទេសកូរ៉េខាងត្បូង ជាសម្ព័ន្ធមិត្តយូរអង្វែង ដែលខ្លួនមានកិច្ចព្រមព្រៀងពាណិជ្ជកម្មសេរីទ្វេភាគី ហើយបានជំរុញឱ្យប្រទេសកូរ៉េខាងត្បូងបង់ប្រាក់បន្ថែម សម្រាប់ទាហានអាមេរិកចំនួន២៨.៥០០នាក់ដែលមានមូលដ្ឋាននៅទីនោះ។

ដោយឡែក សម្ព័ន្ធមិត្តរបស់លោក Trump បានបង្ហាញការព្រួយបារម្ភអំពីជំហរសម្របសម្រួលកាន់តែខ្លាំងឡើងរបស់លោក Lee ចំពោះប្រទេសចិន ដែលជាគូប្រជែងភូមិសាស្ត្រនយោបាយដ៏សំខាន់របស់ទីក្រុងវ៉ាស៊ីនតោន។ លោក Lee ជាអ្នកសេរីនិយម ត្រូវបានបោះឆ្នោតជ្រើសរើសជាប្រធានាធិបតីកាលពីថ្ងៃទី៣ ខែមិថុនា បន្ទាប់ពីអតីតមេដឹកនាំអភិរក្សនិយម លោក Yoon Suk Yeol ត្រូវបានចោទប្រកាន់ និងបណ្តេញចេញពីតំណែង។

ការិយាល័យរបស់លោក Lee បាននិយាយនៅក្នុងសេចក្តីថ្លែងការណ៍ថា «ប្រធានាធិបតីទាំងពីរ បានព្រមព្រៀងគ្នាក្នុងការខិតខំប្រឹងប្រែងដើម្បីឈានដល់កិច្ចព្រមព្រៀងដ៏ជាទីពេញចិត្ត ជុំវិញកិច្ចពិភាក្សាអំពីការដំឡើងពន្ធឱ្យបានឆាប់តាមដែលអាចធ្វើទៅបាន»។ យោងតាមមន្ត្រីសេតវិមានបានឲ្យដឹងថា លោក Trump បានអញ្ជើញលោក Lee ទៅចូលរួមក្នុងជំនួបកំពូលនៅសហរដ្ឋអាមេរិក ហើយមេដឹកនាំទាំងពីរមានផែនការជួបគ្នាក្នុងពេលឆាប់ៗនេះ។ អ្នកវិភាគនិយាយថា ឱកាសដំបូងសម្រាប់ភាគីទាំងពីរជួបគ្នាអាចនៅក្នុងកិច្ចប្រជុំកំពូល G7 នៅប្រទេសកាណាដា នៅពាក់កណ្តាលខែមិថុនានេះ។