ការចែកចាយជំនួយនៅតំបន់ហ្កាហ្សា ត្រូវបានបញ្ឈប់កាលពីថ្ងៃសុក្រ ទី៦ មិថុនា បន្ទាប់ពីមូលនិធិមនុស្សធម៌តំបន់ហ្កាហ្សា គាំទ្រដោយសហរដ្ឋអាមេរិក និងអ៊ីស្រាអែល (GHF) បាននិយាយថា ហ្វូងមនុស្សចង្អៀតណែន បានធ្វើឱ្យវាគ្មានសុវត្ថិភាពក្នុងការបន្តប្រតិបត្តិការ ជាការរំខានដល់កិច្ចខិតខំប្រឹងប្រែងផ្តល់ជំនួយសង្គ្រោះដែលជួបបញ្ហារបស់ខ្លួន។

ដោយខ្វះស្បៀងអាហារធ្ងន់ធ្ងរបានញាំញីតំបន់ហ៊ុមព័ទ្ធឆ្នេរមួយនេះ ខណៈការប្រយុទ្ធគ្នាបានបន្តនៅក្នុងផ្នែកជាច្រើននៃតំបន់ហ្កាហ្សាស្ទ្រីប។ អាជ្ញាធរសុខាភិបាលក្នុងតំបន់បាននិយាយថា ពលរដ្ឋប៉ាឡេស្ទីន១៦នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែល ភាគច្រើននៅតំបន់ហ្កាហ្សាភាគខាងជើង ខណៈកងទ័ពអ៊ីស្រាអែលបាននិយាយថា ទាហានរបស់ខ្លួន៤នាក់ត្រូវបានសម្លាប់ និង៥នាក់ទៀតបានរងរបួសដោយការបំផ្ទុះនៅអគារមួយកន្លែងនៅទីក្រុង Khan Younis ភាគខាងត្បូង។

ក្នុងរយៈពេលមួយថ្ងៃនៃការផ្ញើសារដ៏ច្របូកច្របល់ មូលនិធិមនុស្សធម៌តំបន់ហ្កាហ្សា(GHF) បានប្រកាសជាលើកដំបូងថា ទីតាំងចែកចាយជំនួយរបស់ខ្លួននៅភាគខាងត្បូងតំបន់ហ្កាហ្សាត្រូវបានបិទ ក្រោយមមកទីភ្នាក់ងារនេះបានបង្ហាញថាខ្លួនបានចែកស្បៀងអាហារដល់មនុស្សជាច្រើន មុនពេលនិយាយថាត្រូវតែបិទទ្វារ ជាវិធានការប្រុងប្រយ័ត្នជាមុន។

ខណៈប្រជាជនប៉ាឡេស្ទីននៅទូទាំងតំបន់ហ្កាហ្សាស្ទ្រីបរងការបំផ្លិចបំផ្លាញដោយសង្រ្គាម បានប្រារព្ធការចាប់ផ្តើមថ្ងៃឈប់សម្រាកដ៏សំខាន់បំផុតមួយរបស់សាសនាឥស្លាម Eid al-Adha កងកម្លាំងអ៊ីស្រាអែល បានបន្តប្រតិបត្តិការយោធាដែលពួកគេនិយាយថាចាំបាច់ត្រូតែវកម្ចាត់ និងបំផ្លាញក្រុមសកម្មប្រយុទ្ធហាម៉ាស។