ប្រទេសបង់ក្លាដែស នឹងរៀបចំការបោះឆ្នោតជាតិនៅឆមាសទីមួយនៃខែមេសា ឆ្នាំ២០២៦ បន្ទាប់ពីអំឡុងពេលនៃរដ្ឋាភិបាលមិនជាប់ឆ្នោតបណ្តោះអាសន្ន ចាប់តាំងពីមានភាពវឹកវរដឹកនាំដោយនិស្សិតក្នុងឆ្នាំ ២០២៤ ដែលបានផ្តួលរំលំនាយករដ្ឋមន្ត្រី លោកស្រី Sheikh Hasina នៅពេលនោះ។

រដ្ឋបាល ដែលដឹកនាំដោយលោក Muhammad Yunus ជាម្ចាស់ជ័យលាភីរង្វាន់ណូបែលសន្តិភាព បាននិងកំពុងគ្រប់គ្រងប្រទេសនៅអាស៊ីខាងត្បូងមួយនេះ ដែលមានប្រជាជនចំនួន១៧៣លាននាក់ចាប់តាំងពីខែសីហា នៅពេលដែល លោកស្រី Hasina បានភៀសខ្លួនទៅកាន់ប្រទេសឥណ្ឌា ក្នុងការប្រឈមទៅនឹងបាតុកម្មដ៏ខ្លាំងក្លាជាច្រើន ប្រឆាំងរដ្ឋាភិបាលរបស់លោកស្រី។

ទោះជាយ៉ាងណា រដ្ឋបាលរបស់ លោក Yunus ក៏បានប្រឈមនឹងការមិនពេញចិត្តយ៉ាងខ្លាំងក្នុងប៉ុន្មានសប្តាហ៍ថ្មីៗនេះ ដោយការតវ៉ាជាច្រើនបានផ្ទុះឡើងកាលពីខែមុន។

លោក Yunus បាននិយាយនៅក្នុងសុន្ទរកថាទៅកាន់ប្រជាជាតិ កាលពីថ្ងៃសុក្រថា «បន្ទាប់ពីពិនិត្យឡើងវិញពីសកម្មភាពកំណែទម្រង់ដែលកំពុងបន្ត ខ្ញុំប្រកាសទៅកាន់ប្រជាជននៅថ្ងៃនេះថា ការបោះឆ្នោតជាតិបន្ទាប់ នឹងធ្វើឡើង នៅថ្ងៃណាមួយ នៅឆមាសដំបូងនៃខែមេសា ឆ្នាំ២០២៦។

លោក Yunus ដែលពុំមានសម្ព័ន្ធមិត្តជាមួយគណបក្សណាមួយ ហើយជាអ្នកដែលនិយាយថា លោកមិនចាប់អារម្មណ៍ក្នុងការឈរឈ្មោះបោះឆ្នោត បាននិយាយថាគណៈកម្មាធិការរៀបចំការបោះឆ្នោតនឹងផ្តល់ផែនទីបង្ហាញផ្លូវលម្អិតសម្រាប់ការបោះឆ្នោតនៅពេលសមស្របណាមួយ។