ប្រទេសរុស្ស៊ី បានស្នើឱ្យអង្គការឃ្លាំមើលនុយក្លេអ៊ែររបស់អង្គការសហប្រជាជាតិ សម្របសម្រួលរវាងទីក្រុងមូស្គូ និងទីក្រុងវ៉ាស៊ីនតោន ដើម្បីដោះស្រាយបញ្ហាថាតើត្រូវធ្វើដូចម្តេចជាមួយឥន្ធនៈនុយក្លេអ៊ែររបស់សហរដ្ឋអាមេរិក ដែលរក្សាទុកនៅរោងចក្រថាមពលរបស់អ៊ុយក្រែនគ្រប់គ្រងដោយកងកម្លាំងរុស្ស៊ី។

រុស្ស៊ី ចង់ចាប់ផ្តើមឡើងវិញនូវរោងចក្រនុយក្លេអ៊ែរ Zaporizhzhia ដែលមិនដំណើរការ នៅក្បែរខ្សែបន្ទាត់សមរភូមិមុខសង្រ្គាមក្នុងប្រទេសអ៊ុយក្រែន ហើយធ្លាប់បានផលិតអគ្គិសនីមួយភាគប្រាំរបស់អ៊ុយក្រែន។

លោក Rafael Grossi ប្រមុខទីភ្នាក់ងារថាមពលអាតូមិកអន្តរជាតិ(IAEA) បានប្រាប់សារព័ត៌មានរ៉យទ័រ នៅសប្តាហ៍នេះថា ការចាប់ផ្តើមឡើងវិញ វាមិនអាចធ្វើទៅរួចនោះទេនាពេលបច្ចុប្បន្ននេះ ដោយសារតែខ្វះការផ្គត់ផ្គង់ថាមពលដែលមានស្ថិរភាព និងទឹកសម្រាប់ធ្វើឲ្យត្រជាក់។

ប្រធានថាមពលនុយក្លេអ៊ែររុស្ស៊ី លោក Alexei Likhachev បាននិយាយបន្ទាប់ពីជួបលោក Grossi កាលពីថ្ងៃសុក្រថា រុស្ស៊ី មានឆន្ទៈក្នុងការប្រើប្រាស់ឥន្ធនៈ ដែលផ្គត់ផ្គង់ដោយក្រុមហ៊ុន Westinghouse របស់អាមេរិក បើមិនដូច្នេះទេដកវាចេញទាំងស្រុង ហើយប្រគល់ទៅឲ្យសហរដ្ឋអាមេរិកវិញ។

រុស្ស៊ី និងអ៊ុយក្រែន បានចោទគ្នាទៅវិញទៅមកថា បានបាញ់ផ្លោងលើរោងចក្រនុយក្លេអ៊ែរ Zaporizhzhia ជារោងចក្រធំបំផុតរបស់អឺរ៉ុប ដែលបង្កើនហានិភ័យនៃគ្រោះថ្នាក់ធ្ងន់ធ្ងរ។ លោក Likhachev បាននិយាយថា រុស្ស៊ី បានរៀបចំ «ផែនការគ្រប់ជ្រុងជ្រោយ» សម្រាប់ប្រតិបត្តិការជាដំណាក់កាលនៃរោងចក្រនេះ ប៉ុន្តែវាអាចត្រូវបានអនុវត្ត លុះត្រាតែការគំរាមកំហែងផ្នែកយោធាទាំងអស់ត្រូវបានដកចេញ។