អភិបាលក្រុង លោក Ihor Terekhov នៅថ្ងៃសៅរ៍ (ទី៧ ខែមិថុនា) នេះ បាននិយាយថា រុស្ស៊ីបានវាយប្រហារទីក្រុង Kharkiv នៅភាគខាងកើតនៃប្រទេសអ៊ុយក្រែន នាពេលយប់ ដោយប្រើប្រាស់យានដ្រូន មីស៊ីល និងគ្រាប់បែកតម្រង់គោលដៅ ដោយបានបណ្ដាលឲ្យមនុស្សយ៉ាងហោចណាស់ ៣នាក់បាត់បង់ជីវិត ខណៈ ២២នាក់ បានរងរបួស ក្នុងនោះរួមមានទាំងទារកទើបកើតបាន ១ខែកន្លះផងដែរ។

ក្នុងនាមជាទីក្រុងមួយ ក្នុងចំណោមទីក្រុងធំៗជាងគេបំផុតរបស់អ៊ុយក្រែន Kharkiv ស្ថិតនៅចម្ងាយត្រឹមតែប៉ុន្មានគីឡូម៉ែត្រប៉ុណ្ណោះពីព្រំដែនរុស្ស៊ី និងបានរងនូវការបាញ់ផ្លោងរបស់រុស្សីឥតឈប់ឈរ អំឡុងសង្គ្រាមរយៈពេលជាង ៣ឆ្នាំនេះ។

តាមរយៈកម្មវិធីផ្ញើសារ Telegram នាព្រឹកថ្ងៃសៅរ៍នេះ លោក Terekhov បានឲ្យដឹងថា៖ «ទីក្រុង Kharkiv ពេលនេះ កំពុងជួបប្រទះនឹងការវាយប្រហារយ៉ាងខ្លាំងក្លាបំផុតជាងពេលណាៗទាំងអសើ គិតចាប់តាំងពីសង្រ្គាមពេញបន្ទុកចាប់ផ្ដើមឡើង»។

លោក Terekhov បាននិយាយថា ការផ្ទុះរាប់សិបត្រូវបានឮ នៅក្នុងទីក្រុងនេះ ពេញមួយយប់ ហើយកងទ័ពរុស្ស៊ី កំពុងវាយប្រហារក្នុងពេលដំណាលគ្នា ដោយមីស៊ីល យានដ្រូន និងការទម្លាក់គ្រាប់បែកតម្រង់គោលដៅពីលើអាកាស។ លោកបានកត់សម្គាល់ថា អគារលំនៅឋានច្រើនជាន់ និងឯកជន សំណង់អគារអប់រំ និងហេដ្ឋារចនាសម្ព័ន្ធនានា ត្រូវបានវាយប្រហារ។

រូបថតពីអាជ្ញាធរក្នុងតំបន់ និងទីភ្នាក់ងារសារព័ត៌មាន Reuters បានបង្ហាញថា ផ្ទះសម្បែងជាច្រើនខ្នង និងរថយន្ត ត្រូវបានអគ្គិភ័យឆាបឆេះខ្ទេចទាំងស្រុង និងដោយផ្នែកៗ ហើយអ្នកជួយសង្គ្រោះ បានដឹកអ្នករបួសទៅកាន់កន្លែងសុវត្ថិភាព និងកាយកម្ទេចកម្ទី។

ជាមួយគ្នានេះ យោធាអ៊ុយក្រែនក៏បានឲ្យដឹងថា រុស្ស៊ីបានបាញ់បង្ហោះយានដ្រូនចំនួន ២០៦គ្រឿង មីស៊ីលបាលីស្ទិក ២គ្រាប់ និងមីស៊ីលប្រភេទផ្សេងទៀត ៧គា្រប់ ប្រឆាំងនឹងអ៊ុយក្រែន ពេញមួយយប់៕