កោះតៃវ៉ាន់ កាលពីថ្ងៃសុក្រ (ទី៦ ខែមិថុនា) បានប្រាប់ឲ្យដឹងថា ទីក្រុងប៉េកាំងបានធ្វើសកម្មភាព «បង្កហេតុ» បន្ទាប់ពីប្រទេសចិនបានធ្វើការល្បាត ជុំវិញកោះនេះ ពោលគឺក្រោយមួយថ្ងៃបន្ទាប់ពីមានការជជែកតាមទូរសព្ទ រវាងមេដឹកនាំអាមេរិក និងចិន។

ស្ថាប័នការពារដែនកោះរបស់ទីក្រុងតៃប៉ិ បានឲ្យដឹងថា ខ្លួនបានប្រទះឃើញយន្តហោះយោធាចិនចំនួន ២១គ្រឿង ក្នុងនោះរួមមានទាំងយន្តហោះចម្បាំង និងយានដ្រូនផងដែរ ដោយ ១៥គ្រឿង បានឆ្លងកាត់ខ្សែបន្ទាត់មេដ្យាននៃច្រកសមុទ្រតៃវ៉ាន់ ដែលជា «ការល្បាតត្រៀមប្រយុទ្ធ»។

ស្ថាប័ននេះបានឲ្យដឹងនៅក្នុងសេចក្តីថ្លែងការណ៍មួយថា៖ «សកម្មភាពពាក់ព័ន្ធនេះ គឺជាការបង្កហេតុយ៉ាងខ្លាំង នាំឲ្យមានអស្ថិរភាព និងការគំរាមកំហែងដល់តំបន់ ហើយជាការរំលោភយ៉ាងធ្ងន់ធ្ងរ ចំពោះស្ថានភាពបច្ចុប្បន្ន ក្នុងតំបន់»។

គួរបញ្ជាក់ថា ទីក្រុងប៉េកាំងបានអះអាងថា កោះតៃវ៉ាន់ជាផ្នែកមួយនៃដែនដីរបស់ខ្លួន ហើយមិនបានបោះបង់ការប្រើប្រាស់កម្លាំង ដើម្បីនាំយកកោះនេះឲ្យមកស្ថិតក្រោមការគ្រប់គ្រងរបស់ខ្លួននោះឡើយ។ សម្ពាធយោធាលើទីក្រុងតៃប៉ិ ត្រូវបានបង្កើនខ្លាំងឡើងៗក្នុងប៉ុន្មានឆ្នាំថ្មីៗនេះ ដោយយន្តហោះចម្បាំង និងនាវាកងទ័ពជើងទឹក បានធ្វើប្រតិបត្តិការនៅជុំវិញកោះនេះស្ទើររៀងរាល់ថ្ងៃ។

ការល្បាតកាលពីថ្ងៃទី៦ ខែមិថុនា បានកើតឡើងបន្ទាប់ពីមានការជួបតាមទូរសព្ទ កាលពីថ្ងៃទី៥ ខែមិថុនា រវាងប្រធានាធិបតីអាមេរិក លោក Donald Trump និងសមភាគីចិន លោក Xi Jinping ជាពេលដែលមេដឹកនាំទាំង២ បានពិភាក្សាអំពីកោះតៃវ៉ាន់។ បើយោងតាមទីភ្នាក់ងារសារព័ត៌មានរដ្ឋចិន Xinhua បានឲ្យដឹងថា ក្នុងឱកាសនោះ លោក Xi បានរម្លឹកថា ទីក្រុងវ៉ាស៊ីនតោនគួរតែដោះស្រាយបញ្ហានេះដោយប្រុងប្រយ័ត្ន ដើម្បីបញ្ចៀសកុំឲ្យមានការផ្តាច់ខ្លួនរបស់កោះតៃវ៉ាន់ ជាអ្វីដែលនឹង «ទាញប្រទេសចិន និងសហរដ្ឋអាមេរិកឲ្យធ្លាក់ចូលទៅក្នុងជម្លោះដ៏គ្រោះថ្នាក់»៕