យោធាដែលកំពុងគ្រប់គ្រងសហភាពមីយ៉ាន់ម៉ា នៅថ្ងៃសៅរ៍ (ទី៧ ខែមិថុនា) នេះ បានរិះគន់ធ្ងន់ៗ ចំពោះសេចក្ដីសម្រេចរបស់អង្គការសហប្រជាជាតិ (UN) ដែលមានគោលបំណងទប់ស្កាត់ការរំលោភលើកម្លាំងពលកម្ម នៅក្នុងប្រទេសដែលត្រូវបានហែកហួរដោយសង្រ្គាមមួយនេះ ដោយបានហៅការសម្រេចនេះថា «មានហេតុផលនយោបាយ»។

អង្គការពលកម្មអន្តរជាតិ (ILO) កាលពីថ្ងៃទី៥ ខែមិថុនា បានប្រើប្រាស់មាត្រា ៣៣ នៃរដ្ឋធម្មនុញ្ញរបស់ស្ថាប័ន ដែលអាចឲ្យខ្លួនដាក់ទណ្ឌកម្ម ចំពោះអាជ្ញាធរយោធា ដែលបានដណ្តើមអំណាច តាមរយៈរដ្ឋប្រហារឆ្នាំ២០២១។

ទីភ្នាក់ងារការងាររបស់ UN មួយនេះ បានឲ្យដឹងថា បណ្តាប្រទេសនានា គួរតែធានាឲ្យបានថា ទំនាក់ទំនងរបស់ខ្លួនជាមួយសហភាពមីយ៉ាន់ម៉ា នឹងមិន «មានវិធីណាមួយដែលអាចអនុញ្ញាត សម្របសម្រួល ឬពង្រីកបន្ថែមនូវការរំលោភសិទ្ធិកម្មករ ទាក់ទងនឹងសេរីភាពសមាគម និងពលកម្មដោយបង្ខំ»។

ទីភ្នាក់ងារនេះបានអំពាវនាវដល់ស្ថាប័នអន្តរជាតិនានាឲ្យ «រាយការណ៍ពីសកម្មភាពណាមួយ ដែលអាចឲ្យមាន ឬគាំទ្រការរំលោភលើការងារក្រោមរដ្ឋាភិបាលយោធាមីយ៉ាន់ម៉ា ទាំងដោយផ្ទាល់ ឬប្រយោល។

យ៉ាងណាដ្ដី នៅថ្ងៃទី៧ ខែមិថុនានេះ ក្រសួងការងាររបស់មីយ៉ាន់ម៉ា បានចេញសេចក្តីថ្លែងការណ៍មួយដោយលើកឡើងថា សេចក្ដីសម្រេចត្រូវបានអនុម័ត «ដោយមានភាពលម្អៀង និងអយុត្តិធម៌» ហើយផ្អែកលើ «វិធីសាស្រ្តដែលមានហេតុផលខាងនយោបាយ»។

ក្រុមស៊ើបអង្កេតរបស់ UN លើប្រទេសមីយ៉ាន់ម៉ា កាលពីខែតុលា ឆ្នាំ២០២៣ បានជំរុញឲ្យមេដឹកនាំយោធារបស់ប្រទេសនេះ បញ្ចប់ការប្រើប្រាស់កម្លាំងពលកម្មដោយបង្ខំ នៅក្នុងជួរកងទ័ព និងបញ្ឈប់រាល់អំពើហិង្សាប្រឆាំងនឹងសហជីព។ ក្រុមស៊ើបអង្កេតនោះបានរកឃើញការរំលោភបំពានយ៉ាងទូលំទូលាយលើច្បាប់ពលកម្មដោយបង្ខំអន្តរជាតិ និងសេរីភាពនៃអនុសញ្ញាសមាគម ក្នុងប្រទេសអាស៊ីអាគ្នេយ៍មួយនេះ៕