ប្រទេសជប៉ុន នៅថ្ងៃសៅរ៍ (ទី៧ ខែមិថុនា) បានប្រាប់ឲ្យដឹងថា ខ្លួនកំពុងបង្កើតបាននូវ «វឌ្ឍនភាព» នៅក្នុងកិច្ចពិភាក្សា ដែលមានគោលបំណងបន្ធូរបន្ថយអត្រាពន្ធរបស់ប្រធានាធិបតីអាមេរិក លោក Donald Trump ប៉ុន្តែបានព្រមានថា ភាគីទាំង២ មិនទាន់រកឃើញ «ចំណុចឈានដល់កិច្ចព្រមព្រៀងនៅឡើយទេ»។

ជប៉ុនដែលទាំងជាសម្ព័ន្ធមិត្តដ៏សំខាន់ និងវិនិយោគិនដ៏ធំបំផុតរបស់សហរដ្ឋអាមេរិកនោះ ត្រូវទទួលរងនូវអត្រាពន្ធមូលដ្ឋាន ១០ភាគរយ ជាកម្រិតដែលត្រូវបានដាក់ដូចគ្នាលើប្រទេសភាគច្រើន ដោយបូកបន្ថែមទាំងពន្ធលើរថយន្ត ដែក និងអាលុយមីញ៉ូមផងដែរ។

លើសពីនោះទៀត លោក Trump ក៏បានប្រកាសពន្ធបដិការបន្ថែម ២៤ភាគរយ លើប្រទេសជប៉ុន កាលពីដើមខែមេសា ប៉ុន្តែក្រោយមកបានផ្អាកវិញ រួមនឹងវិធានការស្រដៀងគ្នាលើប្រទេសផ្សេងទៀត រហូតដល់ដើមខែកក្កដា។ ជប៉ុនចង់ឲ្យមានការលើកលែង ចំពោះកម្រិតពន្ធទាំងអស់ដែលប្រកាសដោយលោក Trump។

ប្រេសិតពាណិជ្ជកម្មរបស់ទីក្រុងតូក្យូ លោក Ryosei Akazawa បានប្រាប់អ្នកសារព័ត៌មានជប៉ុននៅទីក្រុងវ៉ាស៊ីនតោនថា៖ «អំឡុងកិច្ចចរចាជុំទី៥ យើងបានធ្វើឲ្យមានវឌ្ឍនភាពបន្ថែមទៀត ដែលជាជំហានឆ្ពោះទៅរកកិច្ចព្រមព្រៀងមួយ»។ ប៉ុន្តែលោកបានបន្ថែមថា៖ «យើងមិនទាន់អាចរកឃើញចំណុចដែលនាំឲ្យមានការព្រមព្រៀងនៅឡើយទេ»។

លោក Akazawa បានសង្កត់ធ្ងន់ថា ទីក្រុងតូក្យូសង្ឃឹមថា នឹងអាចឈានកិច្ចព្រមព្រៀង «ឲ្យបានឆាប់តាមដែលអាចធ្វើទៅបាន»។ តែទោះជាយ៉ាងណាក្ដី ការពិភាក្សាអាចនៅតែបន្តមាន នៅពេលដែលកិច្ចប្រជុំកំពូលនៃក្រុមប្រទេសមានឧស្សាហកម្មលូតលាស់ទាំង៧ (G7) ចាប់ផ្តើមនៅថ្ងៃទី១៥ ខែមិថុនា៕