នាយករដ្ឋមន្ត្រី លោក Benjamin Netanyahu បានទទួលស្គាល់ថា អ៊ីស្រាអែលកំពុងគាំទ្រដល់ក្រុមប្រដាប់អាវុធ នៅតំបន់ហ្កាហ្សា ដែលប្រឆាំងនឹងក្រុមសកម្មប្រយុទ្ធហាម៉ាស ដោយការលើកឡើងនេះកើតឡើងបន្ទាប់ពីមានការអត្ថាធិប្បាយរបស់អតីតរដ្ឋមន្ត្រី ដែលថា អ៊ីស្រាអែលបានផ្ដល់អាវុធទៅឲ្យក្រុមនេះ។

ប្រព័ន្ធផ្សព្វផ្សាយរបស់អ៊ីស្រាអែល និងប៉ាឡេស្ទីន បានរាយការណ៍ថា ក្រុមដែលអ៊ីស្រាអែល បាននិងកំពុងធ្វើការជាមួយ គឺជាផ្នែកមួយនៃក្រុមកុលសម្ព័ន្ធក្នុងតំបន់ឈ្មោះ Bedouin ដែលដឹកនាំដោយលោក Yasser Abu Shabab។

ក្រុមប្រឹក្សាអឺរ៉ុប ស្តីពីទំនាក់ទំនងបរទេស (EFCR) ដែលជាវិទ្យាស្ថានស្រាវជ្រាវ ពិពណ៌នាអំពីលោក Abu Shabab ថា ជាមេដឹកនាំនៃ «ក្រុមឧក្រិដ្ឋជនប្រតិបត្តិការនៅក្នុងតំបន់ Rafah ដែលត្រូវបានចោទប្រកាន់យ៉ាងទូលំទូលាយថា បានលួចរថយន្តជំនួយ»។

សមាជិកសភា Knesset និងជាអតីតរដ្ឋមន្ត្រីការពារជាតិ លោក Avigdor Lieberman បានប្រាប់ទូរទស្សន៍សាធារណៈ Kan ថា រដ្ឋាភិបាលតាមការណែនាំរបស់លោក Netanyahu «ផ្តល់អាវុធដល់ក្រុមឧក្រិដ្ឋជន និងក្រុមប្រព្រឹត្តបទល្មើស»។

ក្នុងវីដេអូមួយដែលត្រូវបានបានបង្ហោះនៅលើបណ្តាញសង្គម កាលពីថ្ងៃព្រហស្បតិ៍ (៥ មិថុនា) លោក Netanyahu បាននិយាយថា៖ «តើលោក Lieberman បង្ហាញពីអ្វី? តាមការណែនាំរបស់មន្ត្រីសន្តិសុខ យើងបានចាប់ផ្ដើមធ្វើការជាមួយក្រុម នៅតំបន់ហ្កាហ្សា ដែលប្រឆាំងនឹងក្រុមហាម៉ាស។ តើមានអ្វីអាក្រក់ទៅ? ផ្ទុយទៅវិញ វាត្រឹមតែជារឿងល្អប៉ុណ្ណោះ ព្រោះវាកំពុងសង្គ្រោះជីវិតទាហានអ៊ីស្រាអែល»។

អ្នកជំនាញផ្នែកកិច្ចការប៉ាឡេស្ទីន នៅមជ្ឈមណ្ឌល Moshe Dayan ក្នុងទីក្រុង Tel Aviv លោក Michael Milshtein បានប្រាប់សារព័ត៌មាន AFP ថា ក្រុមរបស់លោក Abu Shabab គឺជាផ្នែកមួយនៃក្រុមកុលសម្ព័ន្ធ Bedouin ដែលរស់នៅចន្លោះព្រំដែនតំបន់ហ្កាហ្សា និងឧបទ្វីប Sinai របស់ប្រទេសអេហ្ស៊ីប៕