មន្ត្រីជំនិតជាន់ខ្ពស់បីរូបរបស់លោកប្រធានាធិបតីអាមេរិក Donald Trump នឹងជួបសមភាគីចិននៅទីក្រុងឡុងដ៍ចក្រភពអង់គ្លេសនៅថ្ងៃចន្ទទី ៩ ខែមិថុនាសប្ដាហ៍ក្រោយ សម្រាប់កិច្ចពិភាក្សាក្នុងគោលបំណងដោះស្រាយជម្លោះពាណិជ្ជកម្មរវាងប្រទេសមានសេដ្ឋកិច្ចធំជាងគេបំផុតទាំងពីររបស់ពិភពលោក។

រដ្ឋមន្ត្រីក្រសួងរតនាគារសហរដ្ឋអាមេរិក Scott Bessent រដ្ឋមន្ត្រីពាណិជ្ជកម្មលោក Howard Lutnick និងមន្ត្រីតំណាងពាណិជ្ជកម្មលោក Jamieson Greer នឹងតំណាងឱ្យសហរដ្ឋអាមេរិកនៅក្នុងកិច្ចពិភាក្សានេះ នេះបើតាមលោក Trump ដែលបានប្រកាសនៅលើវេទិកាសង្គម Truth Social ដោយពុំផ្តល់ព័ត៌មានលម្អិតបន្ថែម។

ក្រសួងការបរទេសចិនបាននិយាយកាលពីថ្ងៃសៅរ៍ថា ឧបនាយករដ្ឋមន្ត្រីលោកហ៊ើ លីហ្វឹង (He Lifeng) នឹងមានវត្តមាននៅក្នុងចក្រភពអង់គ្លេសចន្លោះពីថ្ងៃទី ៨ ដល់ថ្ងៃទី១៣ ខែមិថុនា ដោយបន្ថែមថាកិច្ចប្រជុំលើកដំបូងនៃយន្តការពិគ្រោះយោបល់សេដ្ឋកិច្ច និងពាណិជ្ជកម្មចិន-អាមេរិក នឹងធ្វើឡើងក្នុងអំឡុងដំណើរទស្សនកិច្ចនេះ។

លោក Trump បានសរសេរទៀតថា កិច្ចប្រជុំនោះគួរតែដំណើរការបានល្អ។លោក Trump បាននិយាយទៅកាន់ប្រធានាធិបតីចិនលោក Xi Jinping កាលពីថ្ងៃព្រហស្បតិ៍ ក្នុងការសន្ទនាតាមទូរស័ព្ទដ៏កម្ររវាងមេដឹកនាំទាំងពីរ ស្របពេលមានភាពតានតឹងពាណិជ្ជកម្មជាច្រើនសប្តាហ៍ និងជម្លោះលើរ៉ែសំខាន់ៗ។លោក Donald Trump កាលពីថ្ងៃសុក្រ ៦ មិថុនាបាននិយាយថា លោកប្រធានាធិបតីចិន Xi Jinping បានយល់ព្រមអនុញ្ញាតឲ្យមានលំហូររ៉ែកម្រ និងមេដែកទៅកាន់សហរដ្ឋអាមេរិក ជាចំណាត់ការមួយដែលអាចសម្រាលភាពតានតឹងរវាងមហាអំណាចទាំងពីរ ៕