ទីភ្នាក់ងារការពារជនស៊ីវិលរបស់ហ្កាហ្សាបាននិយាយកាលពីថ្ងៃសៅរ៍ ៧ មិថុនា ថា កងកម្លាំងអ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់ ៣៦នាក់ ក្នុងនោះ៦នាក់ ក្នុងការបាញ់ប្រហារនៅក្បែរមជ្ឈមណ្ឌលចែកចាយជំនួយដែលគាំទ្រដោយសហរដ្ឋអាមេរិក។

យោធាអ៊ីស្រាអែលបានប្រាប់សារព័ត៌មាន AFP ថា កងទ័ពបានបាញ់ជាការព្រមាន ទៅលើក្រុមបុគ្គលដែលខ្លួនបាននិយាយថា កំពុងបង្កគ្រោះថ្នាក់ដល់កងទ័ព។ 

ការស្លាប់ដោយការបាញ់ប្រហារគឺជាសេចក្តីរាយការណ៍ចុងក្រោយបង្អស់នៅជិតមជ្ឈមណ្ឌលជំនួយដែលគ្រប់គ្រងដោយមូលនិធិមនុស្សធម៌ហ្កាហ្សា (GHF) នៅក្នុងស្រុក Rafah ភាគខាងត្បូង ហើយបានកើតឡើងបន្ទាប់ពីបានបន្តការចែកចាយឡើងវិញ ក្រោយការផ្អាកមួយរយៈបន្ទាប់ពីមានការស្លាប់ស្រដៀងគ្នាកាលពីដើមសប្តាហ៍នេះ។ 

ទន្ទឹមនឹងនេះដែរ នាវាដឹកជំនួយដែលមានសកម្មជន ១២នាក់នៅលើនោះ រួមទាំងអ្នកធ្វើយុទ្ធនាការអាកាសធាតុជនជាតិស៊ុយអែតលោកស្រី Greta Thunberg បានកំពុងខិតជិតតំបន់ហ្កាហ្សាក្នុងគោលបំណងបង្ហាញពីស្ថានភាពរបស់ប៉ាឡេស្ទីនក្នុងការប្រឈមនឹងការបិទផ្លូវរបស់អ៊ីស្រាអែលដែលទើបតែត្រូវបានបន្ធូរបន្ថយមួយផ្នែកប៉ុណ្ណោះ។

កាលពីថ្ងៃសៅរ៍ ក្រសួងសុខាភិបាលនៅតំបន់ហ្កាហ្សាគ្រប់គ្រងដោយក្រុមហាម៉ាស បាននិយាយថាចំនួនអ្នកស្លាប់សរុបសម្រាប់សង្គ្រាមក្នុងដែនដីហ្កាហ្សានេះ បានកើនឡើងដល់៥៤.៧៧២នាក់ ភាគច្រើនជាជនស៊ីវិល ។ អង្គការសហប្រជាជាតិចាត់ទុកតួលេខទាំងនេះគួរឱ្យទុកចិត្ត៕