ក្រុមមន្ត្រីបាននិយាយថា ប្រទេសរុស្ស៊ី បានវាយប្រហារទីក្រុងធំបំផុតទីពីររបស់អ៊ុយក្រែន គឺទីក្រុង Kharkiv ដោយប្រើយានដ្រូន និងយន្តហោះទម្លាក់គ្រាប់បែកដ៏ធំបំផុត ដែលបានសម្លាប់មនុស្ស ៤ នាក់ និងជិត៦០នាក់រងរបួស។

ក្រុមអាជ្ញាធរក្នុងតំបន់បាននិយាយថា មនុស្សពីរនាក់ក៏ត្រូវបានសម្លាប់ក្នុងការវាយប្រហាររបស់រុស្ស៊ីទៅលើតំបន់ Kherson នៅភាគខាងត្បូងប្រទេសអ៊ុយក្រែនផងដែរ។

អភិបាលក្រុង Kharkiv លោក Ihor Terekhov បាននិយាយថា យានដ្រូនចំនួន ៤៨ គ្រឿង មីស៊ីលចំនួន២ គ្រាប់ និងយន្តហោះទម្លាក់គ្រាប់បែកចំនួន៤គ្រឿង ត្រូវបានប្រើប្រាស់ប្រឆាំងនឹងទីក្រុងរបស់លោកកាលពីយប់ថ្ងៃសុក្រ ខណៈយន្តហោះទម្លាក់គ្រាប់បែកជាច្រើនត្រូវបានគេរាយការណ៍ថាបានទម្លាក់គ្រាប់កាលពីថ្ងៃសៅរ៍។

មុននេះ ទីក្រុងមូស្គូបាននិយាយថា ការវាយប្រហារដោយយានដ្រូន និងមីស៊ីលដ៏ធំនៅទូទាំងប្រទេសអ៊ុយក្រែនកាលពីយប់ថ្ងៃព្រហស្បតិ៍ គឺជាការឆ្លើយតបទៅនឹងការវាយប្រហារភេរវកម្មដោយរបបក្រុង  គីវ បន្ទាប់ពីអ៊ុយក្រែនបានបើកការវាយប្រហារលើហេដ្ឋារចនាសម្ព័ន្ធផ្លូវដែក និងមូលដ្ឋានទ័ពអាកាសរុស្ស៊ី កាលពីចុងសប្តាហ៍មុន។ 

គួររម្លឹកថាមនុស្ស៦នាក់បានស្លាប់ និង៨០នាក់បានរងរបួសនៅទូទាំងប្រទេសអ៊ុយក្រែន កាលពីយប់ថ្ងៃព្រហស្បតិ៍ នៅពេលរុស្ស៊ី បានវាយប្រហារប្រទេសនេះដោយប្រើយានដ្រូនជាង៤០០គ្រឿង និងមីស៊ីលជិត៤០គ្រាប់៕