ស្ថានភាពទឹកជំនន់នៅរដ្ឋ Assamប្រទេសឥណ្ឌាមានភាពប្រសើរឡើងបន្តិច បើទោះចំនួនអ្នកស្លាប់ពាក់ព័ន្ធទឹកជំនន់ និងបំណាក់ដី បានកើនឡើងដល់២៣នាក់ ដោយមានអ្នកស្លាប់ថ្មីពីរនាក់ទៀតត្រូវបានរាយការណ៍ក៏ដោយ។

ស្របពេលទន្លេព្រហ្មបុត្រ (Brahmaputra) និងទន្លេសំខាន់ៗផ្សេងទៀតបន្តស្រក ចំនួនប្រជាជនដែលរងផលប៉ះពាល់ក៏មានការថយចុះដែរ ប៉ុន្តែរដ្ឋនេះនៅតែប្រឈមនឹងបញ្ហាសំខាន់ៗ ជាពិសេសនៅក្នុងស្រុកនានា ដែលរងផលប៉ះពាល់ដោយទឹកជំនន់។

ចំនួនអ្នកស្លាប់ក្នុងគ្រោះទឹកជំនន់ និងបំណាក់ដីនៅភាគឦសានទាំងមូលបានកើនឡើងដល់ ៥២នាក់។

យោងតាមអាជ្ញាធរគ្រប់គ្រងគ្រោះមហន្តរាយរដ្ឋ Assam (ASDMA) ប្រជាជនចំនួន៣,៣៧លាននាក់នៅទូទាំងស្រុកចំនួន១២ នៅតែរងផលប៉ះពាល់ដោយទឹកជំនន់ ដោយមានតំបន់ ចំនួន៤១ និងភូមិចំនួន៩៩៩នៅតែលិចទឹក។ទន្ទឹមនឹងកម្រិតទឹកក្នុងទន្លេសំខាន់ៗដូចជាទន្លេព្រហ្មបុត្រមានទំនោរស្រក តំបន់មួយចំនួននៅតែបន្តជួបប្រទះកម្រិតទឹកខ្ពស់ ដែលបណ្តាលឱ្យមានការរំខានជាបន្តបន្ទាប់។

តំបន់ដែលរងផលប៉ះពាល់ខ្លាំងជាងគេគឺតំបន់ Sribhumi ដែលប្រជាជន១,៩៣លាននាក់កំពុងដោះស្រាយទឹកជំនន់។ ស្រុកដែលរងផលប៉ះពាល់ធ្ងន់ធ្ងរផ្សេងទៀតរួមមានស្រុក Hailakandi មានប្រជាជនចំនួន ៧៣.៧២៤ នាក់ រងផលប៉ះពាល់ និងស្រុក Cachar មានប្រជាជនចំនួន៥៦.៣៩៨នាក់រងផលប៉ះពាល់៕