ភ្នំពេញ៖ មន្ត្រីរាជរដ្ឋាភិបាល រួមទាំងអង្គការដៃគូ បានស្នើទៅកាន់ប្រព័ន្ធផ្សព្វផ្សាយនានា ជួយផ្សព្វផ្សាយឲ្យបានផុលផុស ពីបញ្ហាអាហារូបត្ថម្ភ ខណៈពួកគេលើកឡើងថា ការចុះផ្សាយ និងការយល់ដឹងពីបញ្ហាអាហារូបត្ថម្ភនេះ នៅមានកម្រិត ។

 ក្នុងវគ្គបណ្ដុះបណ្ដាលអ្នកសារព័ត៌មាន ស្តីពីការរាយការណ៍ព័ត៌មានអំពីអាហារូបត្ថម្ភ និងការចិញ្ចឹមទារក និងកុមារ រយៈពេល២ថ្ងៃ ចាប់ពីថ្ងៃទី២២ ដល់ទី២៣ ខែធ្នូ ឆ្នាំ២០២១ ឯកឧត្តម សុខ ស៊ីឡូ អគ្គលេខាធិការក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ មានប្រសាសន៍ថា ប្រព័ន្ធផ្សព្វផ្សាយ មានតួនាទីយ៉ាងសំខាន់ណាស់ ក្នុងការលើកកម្ពស់ការយល់ដឹងជាសាធារណៈអំពីសារសំខាន់ នៃអាហារូបត្ថម្ភ និងការចិញ្ចឹមទារក និងកុមារ ដែលបានរួមចំណែកដល់ការអភិវឌ្ឍមូលធនមនុស្ស សេដ្ឋកិច្ច និងសង្គមជាតិ ។ 

ឯកឧត្តម បានបន្តថា ប៉ុន្តែកន្លងមកសង្កេតឃើញថា ការផ្សព្វផ្សាយព័ត៌មានក្នុងវិស័យនេះ មិនសូវបានទទួលការចាប់អារម្មណ៍ ពីសំណាក់អ្នកសារព័ត៌មាន ដោយសារតែចំណេះដឹងរបស់របស់ពួកគេ នៅមានកម្រិត និងការខ្វះទំនាក់ទំនង រវាងអ្នកសារព័ត៌មាន និងអ្នកធ្វើការលើវិស័យសន្តិសុខស្បៀង និងអាហារូបត្ថម្ភ ។ 

ឯកឧត្តម សុខ ស៊ីឡូ បន្ថែមថា ពាក់ព័ន្ធនឹងបញ្ហានេះ អង្គការ Helen Keller, GIZ គម្រោង MUSEFO បានរៀបចំវគ្គបណ្តុះបណ្តាលអ្នកសារព័ត៌មាន ស្តីពីការរាយការណ៍ព័ត៌មានអំពីអាហារូបត្ថម្ភ និងការចិញ្ចឹមទារក និងកុមារនេះឡើង គោលបំណង ដើម្បីបង្កើនចំណេះដឹង និងសមត្ថភាពក្នុងចំណោមអ្នកសារព័ត៌មាន ព្រមទាំងពង្រឹងកិច្ចសហប្រតិបត្តិការ របស់ប្រព័ន្ធផ្សព្វផ្សាយជាមួយក្រសួងការងារ និងបណ្តុះបណ្តាល វិជ្ជាជីវៈ ក្រសួងសុខាភិបាល និងក្រុមប្រឹក្សារស្តារអភិវឌ្ឍន៍វិស័យកសិកម្ម និងជនបទ ក៏ដូចជាដៃគូអភិវឌ្ឍន៍ និងអង្គការសង្គមស៊ីវិលនានា មានអង្គការ Helen Keller ជាដើម ដើម្បីផ្សព្វផ្សាយព័ត៌មានក្នុងវិស័យនេះ ឱ្យបានកាន់តែទូលំទូលាយដល់ស្រទាប់សាធារណៈជន ។

ក្នុងឱកាសនោះ លោកស្រី Gwyneth Cotes នាយិការអង្គការ Helen Keller បានថ្លែងថា ចំពោះអាហារូបត្ថម្ភនេះ ពិតជាមានសារសំខាន់ណាស់ សម្រាប់ជីវិតមនុស្ស ហើយសូមស្នើដល់អ្នកសារព័ត៌មាន សូមជួយផ្សព្វផ្សាយ និងរាយការណ៍អាហារូបត្ថម្ភ ការចិញ្ចឹមទារក និងកុមារ ៕អត្ថបទ ៖ សុខរិទ្ធ