ពលរដ្ឋប៉ាឡេស្ទីយ៉ាងហោចណាស់ ១៣ នាក់បានស្លាប់ និងជាង១៥០ នាក់បានរងរបួស បន្ទាប់ពីទាហានអ៊ីស្រាអែល និងក្រុមអ្នកម៉ៅការសន្តិសុខអាមេរិក បានបើកការបាញ់ប្រហារទៅលើហ្វូងមនុស្សដែលកំពុងរង់ចាំទទួលអាហារនៅជិតកន្លែងចែកចាយជំនួយចំនួនពីរកន្លែងក្នុងដែនដីហ្កាហ្សា មួយនៅភាគខាងកើតនៃទីក្រុង រ៉ាហ្វា និងមួយទៀតនៅជិតស្ពានវ៉ាឌីហ្កាហ្សា (Wadi Gaza Bridge)។

ការសម្លាប់កាលពីថ្ងៃអាទិត្យគឺជាការវាយប្រហារចុងក្រោយបំផុតលើជនស៊ីវិលដែលកំពុងស្វែងរកអាហារនៅមជ្ឈមណ្ឌលជំនួយដំណើរការដោយមូលនិធិមនុស្សធម៌ហ្កាហ្សា (GHF)ដ៏ចម្រូងចម្រាស ជាគំនិតផ្តួចផ្តើមដឹកនាំដោយសហរដ្ឋអាមេរិកគាំទ្រដោយអ៊ីស្រាអែលក្នុងតំបន់គ្រប់គ្រងដោយអ៊ីស្រាអែល។

ឥឡូវនេះមនុស្សជាង១៣០ នាក់ត្រូវបានសម្លាប់ និងជាង៧០០ នាក់បានរងរបួសដោយកងទ័ពអ៊ីស្រាអែល ខណៈកំពុងព្យាយាមយ៉ាងអស់សង្ឃឹមក្នុងការទទួលបានកញ្ចប់អាហារតិចតួចសម្រាប់គ្រួសារដែលស្រេកឃ្លានរបស់ពួកគេពីកន្លែងផ្តល់ជំនួយចាប់តាំងពីកម្មវិធីរបស់មូលនិធិមនុស្សធម៌ហ្កាហ្សា បានចាប់ផ្តើមកាលពីថ្ងៃទី ២៧ ខែឧសភា។

ជាមួយគ្នានោះ មនុស្សយ៉ាងហោចណាស់៩នាក់នៅតែបាត់ខ្លួន។

ក្នុងសេចក្តីថ្លែងការណ៍មួយ ការិយាល័យប្រព័ន្ធផ្សព្វផ្សាយរដ្ឋាភិបាលហ្កាហ្សាបានថ្កោលទោសទីតាំងចែកចាយថាជាកន្លែងសត្តឃាតលើមនុស្ស ដោយចោទប្រកាន់កងកម្លាំងអ៊ីស្រាអែលថាបានទាក់ទាញជនស៊ីវិលដែលអស់សង្ឃឹមឲ្យទៅស្លាប់។

ការជំរុញគាំទ្រដោយអ៊ីស្រាអែល និងសហរដ្ឋអាមេរិក បានប្រឈមការរិះគន់កាន់តែខ្លាំងពីបណ្ដាអង្គការសិទ្ធិមនុស្ស និងអង្គការសហប្រជាជាតិ ចំពោះការរំលោភលើស្តង់ដារមនុស្សធម៌ជាមូលដ្ឋាន និងរំលងអង្គការដែលមានបទពិសោធន៍ជាច្រើនទសវត្សរ៍ក្នុងការចែកចាយជំនួយដល់ប្រជាជន ទាំងមូលនៃតំបន់ដែលរងការឡោមព័ទ្ធមួយនេះ៕