ក្រុមមន្ត្រីអាមេរិក បានប្រាប់សារព័ត៌មានរ៉យទ័រថា សហរដ្ឋអាមេរិក ជឿជាក់ថា ការគំរាមសងសឹករបស់លោកប្រធានាធិបតីរុស្ស៊ី Vladimir Putin ប្រឆាំងនឹងអ៊ុយក្រែន ជុំវិញការវាយប្រហារយានដ្រូនកាលពីចុងសប្តាហ៍មុន មិនទាន់បញ្ចប់នៅឡើយទេ ហើយទំនងជានៅមានការវាយប្រហារច្រើនដង ច្រើនលើក និងទ្រង់ទ្រាយធំបន្ថែមទៀត។

ពេលវេលានៃការឆ្លើយតបពេញលេញរបស់រុស្ស៊ី គឺមិនច្បាស់លាស់ឡើយ ដោយប្រភពមួយបាននិយាយថា គេរំពឹងទុករឿងនេះក្នុងរយៈពេលប៉ុន្មានថ្ងៃបន្ទាប់។ មន្ត្រីអាមេរិកទីពីរនិយាយថា ការសងសឹកនេះទំនងជារួមបញ្ចូលប្រភេទផ្សេងៗនៃសមត្ថភាពតាមអាកាស រួមទាំងមីស៊ីល និងយានដ្រូន។

ប្រភពពីមន្ត្រីដែលសុំមិនបញ្ចេញឈ្មោះទាំងនោះបាននិយាយថា ការវាយប្រហាររបស់ទីក្រុងមូស្គូ នឹងមានលក្ខណៈ "មិនស៊ីសង្វាក់គ្នា" មានន័យថា វិធីសាស្រ្ត និងគោលដៅរបស់ខ្លួន នឹងមិនឆ្លុះបញ្ចាំងពីការវាយប្រហាររបស់អ៊ុយក្រែន កាលពីចុងសប្តាហ៍មុនប្រឆាំងនឹងយន្តហោះចម្បាំងរុស្ស៊ីនោះទេ។

គួរឱ្យដឹងថា រុស្ស៊ី បានបាញ់មីស៊ីល និងយានដ្រូនយ៉ាងសន្ធាប់ទៅលើរដ្ឋធានីគីវ របស់អ៊ុយក្រែន កាលពីថ្ងៃសុក្រសប្ដាហ៍មុន ហើយក្រសួងការពារជាតិរុស្ស៊ី និយាយថា ការវាយប្រហារលើទីតាំងយោធា និងគោលដៅដែលទាក់ទងនឹងយោធាទាំងនេះ គឺដើម្បីឆ្លើយតបទៅនឹងអ្វីដែលខ្លួនហៅថា "អំពើភេរវកម្ម" របស់អ៊ុយក្រែន ប្រឆាំងនឹងរុស្ស៊ី។ ប៉ុន្តែក្រុមមន្ត្រីអាមេរិកជឿជាក់ថា ការឆ្លើយតបពេញលេញទាំងស្រុងរបស់រុស្ស៊ី នៅមិនទាន់មកដល់នៅឡើយទេ៕