អ៊ីស្រាអែល បានស្ទាក់ចាប់នាវាដឹកជំនួយទៅកាន់តំបន់ហ្កាហ្សា ដែលដឹកនាំដោយលោកស្រី Greta Thunberg សកម្មជនអាកាសធាតុស៊ុយអែត និងសកម្មជនលេចធ្លោផ្សេងទៀត ដោយឃុំខ្លួនមនុស្សនៅលើវានានោះទាំងអស់ រួចនាំយកនាវានោះទៅអ៊ីស្រាអែល។

សម្ព័ន្ធ Freedom Flotilla Coalition (FFC) មុននេះ បាននិយាយថា យោធាអ៊ីស្រាអែលបានឡើងលើនាវា មានឈ្មោះថាMadleen ដែលកំពុងព្យាយាមផ្តល់ជំនួយដល់ដែនដីហ្កាហ្សា។

ក្រសួងការបរទេសអ៊ីស្រាអ៊ែល បាននិយាយក្នុងការបង្ហោះលើបណ្ដាញសង្គម Xថា ក្រុមអ្នកដំណើរត្រូវគេរំពឹងថានឹងវិលត្រឡប់ទៅកាន់ប្រទេសរបស់ពួកគេវិញ ។

សកម្មជនអាកាសធាតុលោកស្រី Thunberg   តារាភាពយន្តអៀរឡង់ក្នុងរឿង "Game of Thrones" គឺលោក Liam Cunningham និងមេធាវីជនជាតិបារាំងលោកស្រី Rima Hassan ដែលជាសមាជិកសភាអឺរ៉ុបរបស់បារាំងផងដែរ ស្ថិតក្នុងចំណោមអ្នកដែលនៅលើនាវា Madleen ។

ក្រុម FFC បានបង្ហោះរូបថតនៅលើបណ្ដាញ Telegram នៅព្រឹកថ្ងៃចន្ទសប្ដាហ៍នេះ ម៉ោងក្នុងស្រុក ដោយបង្ហាញសមាជិកនាវិកកំពុងអង្គុយនៅខាងក្នុងនាវាដោយពាក់អាវពោង និងលើកដៃឡើងលើ។ គ្មានទាហានកងកម្លាំងការពារអ៊ីស្រាអែល អាចត្រូវបានគេមើលឃើញក្នុងរូបភាពនោះទេ។

ក្នុងការប្រកាសមុននេះ FFC បាននិយាយថា នាវាបានស្ថិតនៅក្រោមការវាយលុកក្នុងដែនទឹកអន្តរជាតិ៕