បញ្ជាការប្រតិបត្តិការនៃកងកម្លាំងប្រដាប់អាវុធប៉ូឡូញ បាននិយាយថា យន្តហោះចម្បាំងប៉ូឡូញ និងសម្ព័ន្ធមិត្តត្រូវបានដាក់ឱ្យសកម្មនៅក្នុងប្រតិបត្តិការត្រៀមខ្លួននាព្រឹកថ្ងៃចន្ទ (០៩ មិថុនា) នេះ ដើម្បីធានាសុវត្ថិភាពដែនអាកាសរបស់ប៉ូឡូញ បន្ទាប់ពីរុស្ស៊ី បានបើកការវាយប្រហារតាមអាកាសសំដៅលើភាគខាងលិចអ៊ុយក្រែន នៅជិតព្រំដែនជាមួយប៉ូឡូញ។

បញ្ជាការបាននិយាយលើបណ្ដាញសង្គម X ថា "ជំហានដែលបានធ្វើឡើងគឺសំដៅធានាសន្តិសុខនៅក្នុងតំបន់ដែលមានព្រំប្រទល់ជាប់នឹងតំបន់រងហានិភ័យ"។ ទូទាំងប្រទេសអ៊ុយក្រែនទាំងមូលស្ថិតនៅក្រោមការជូនដំណឹងពីការវាយឆ្មក់តាមអាកាសគិតត្រឹមម៉ោងក្នុងស្រុក ០២:០០យប់ចូលថ្ងៃចន្ទនេះ បន្ទាប់ពីកងទ័ពអាកាសអ៊ុយក្រែន បានព្រមានពីការវាយប្រហារដោយមីស៊ីល និងយានដ្រូនរបស់រុស្ស៊ី។

ការវាយប្រហារយានដ្រូននៅពេលយប់របស់រុស្ស៊ី ហើយជារឿយៗក៏មានមីស៊ីលផងដែរ បានក្លាយជារឿងធម្មតាទៅហើយនៅអ៊ុយក្រែន ខណៈប្រទេសនេះស្ថិតក្នុងឆ្នាំទី៤ នៃសង្រ្គាមការពាររបស់ខ្លួន។

មីស៊ីលរបស់រុស្ស៊ី និងអ៊ុយក្រែន ពេលខ្លះបានឆ្លងចូលទៅក្នុងដែនអាកាសប៉ូឡូញ និងសមាជិកណាតូផ្សេងទៀត។ កាលឆ្នាំ២០២២ មនុស្សពីរនាក់ត្រូវបានសម្លាប់នៅភាគខាងកើតប៉ូឡូញ នៅក្នុងអ្វីដែលការិយាល័យរដ្ឋអាជ្ញាប៉ូឡូញនិយាយថា គឺជាមីស៊ីលការពារដែនអាកាសរបស់អ៊ុយក្រែន S-300 ដែលធ្លាក់ចេញពីផ្លូវហោះហើរ ក្នុងអំឡុងការវាយប្រហាររបស់រុស្ស៊ី៕