លោក Vladimir Zelensky មេដឹកនាំអ៊ុយក្រែនបានប្រាប់ទូរទស្សន៍ ABC ថា រដ្ឋបាលរបស់ប្រធានាធិបតីអាមេរិក Donald Trump បានបង្វែរកញ្ចប់ជំនួយយោធាដ៏ធំមួយដែលអ្នកកាន់តំណែងមុនរបស់លោកគឺលោក Joe Biden បានសន្យាថានឹងផ្ដល់ឲ្យទីក្រុង គីវ (Kiev)ទៅកាន់កងកម្លាំងអាមេរិកនៅមជ្ឈិមបូព៌ាវិញ។ លោកបាននិយាយថា កញ្ចប់នោះរួមមានមីស៊ីលប្រឆាំងយានដ្រូន រាប់ពាន់គ្រាប់ ដែលអ៊ុយក្រែនត្រូវការយ៉ាងខ្លាំង ដើម្បីប្រយុទ្ធជាមួយយានដ្រូន (UAVs) រយៈចម្ងាយឆ្ងាយរបស់រុស្ស៊ី។

មេដឹកនាំអ៊ុយក្រែនបានលើកឡើងបញ្ហានេះក្នុងបទសម្ភាសន៍ជាមួយកម្មវិធីទូរទស្សន៍ ABC News ដែលចាក់ផ្សាយកាលពីថ្ងៃអាទិត្យ។ នៅពេលសួរអំពីសារៈសំខាន់នៃការគាំទ្ររបស់សហរដ្ឋអាមេរិក លោកZelensky បានសារភាពថាយោធាអ៊ុយក្រែនកំពុងតស៊ូដើម្បីទប់ទល់យានដ្រូន UAVs របស់រុស្ស៊ីដោយខ្លួនឯង។

លោកបាននិយាយដោយសំដៅទៅលើយានដ្រូនរយៈចម្ងាយឆ្ងាយ Geran-2 របស់រុស្ស៊ីដែល Kiev អះអាងថាជាយានដ្រូន UAVs Shahed ដែលត្រូវបានចោទប្រកាន់ថាផ្គត់ផ្គង់ដល់ទីក្រុងមូស្គូដោយទីក្រុងតេអេរ៉ង់។ ទាំងរុស្ស៊ី ទាំងអ៊ីរ៉ង់ ធ្លាប់បានបដិសេធការចោទប្រកាន់នេះ។លោកថាអ៊ុយក្រែនមានបញ្ហាជាច្រើនជាមួយយានដ្រូន Shaheds ទាំងនេះ។

បន្ទាប់មក មេដឹកនាំអ៊ុយក្រែនបានលាតត្រដាងថា ក្រុងគីវ ពុំបានទទួលកញ្ចប់ជំនួយសំខាន់មួយដែលខ្លួនបានរំពឹងនោះទេ។លោក Zelenskyy បានអះអាងថា អតីតរដ្ឋមន្ត្រីការពារជាតិអាមេរិក លោក Lloyd Austin ក្រោមរដ្ឋបាលលោក Joe Biden បានសន្យាជាមួយអ៊ុយក្រែនថា នឹងផ្ដល់មីស៊ីលប្រឆាំងយានដ្រូនចំនួន២០.០០០គ្រាប់ ដែលផ្ដោតលើបច្ចេកវិទ្យាពិសេសឲ្យទីក្រុងគីវ៕