បម្រាមថ្មីរបស់លោកប្រធានាធិបតីអាមេរិក Donald Trump លើការធ្វើដំណើរចូលសហរដ្ឋអាមេរិក ដោយពលរដ្ឋមកពីប្រទេសចំនួន១២ ជាចម្បងនៅអាហ្វ្រិក និងមជ្ឈិមបូព៌ា គ្រោងចូលជាធរមាននៅម៉ោងក្នុងស្រុក ១២:០១នាទីរំលងអាធ្រាត្រចូលថ្ងៃចន្ទ (០៩ មិថុនា) នេះ ស្របពេលភាពតានតឹងកាន់តែខ្លាំងក្លាលើយុទ្ធនាការអនុវត្តច្បាប់អន្តោប្រវេសន៍ដែលមិនធ្លាប់មានពីមុនមករបស់អាមេរិក។

សេចក្តីប្រកាសថ្មី ដែលលោក Trump បានចុះហត្ថលេខាកាលថ្ងៃពុធសប្ដាហ៍មុន អនុវត្តចំពោះពលរដ្ឋនៃប្រទេសអាហ្វហ្គានីស្ថាន មីយ៉ាន់ម៉ា ឆាដ កុងហ្គោ ហ្គីណេអេក្វាទ័រ អេរីត្រេ ហៃទី អ៊ីរ៉ង់ លីប៊ី សូម៉ាលី ស៊ូដង់ និងយេម៉ែន។ បម្រាមនោះក៏ដាក់កំហិតខ្លាំងលើប្រជាជនមកពីប៊ូរុនឌី គុយបា ឡាវ សៀរ៉ាឡេអូន តូហ្គោ តួកម៉េនីស្ថាន និងវ៉េណេស៊ុយអេឡា ដែលនៅក្រៅទឹកដីអាមេរិក ហើយពុំមានទិដ្ឋាការត្រឹមត្រូវ។

ការហាមប្រាមថ្មីនេះមិនដកហូតទិដ្ឋាការដែលបានចេញពីមុនដល់ប្រជាជនមកពីប្រទេសក្នុងបញ្ជីនេះទេ នេះបើយោងតាមសេចក្ដីណែនាំដែលចេញផ្សាយកាលពីថ្ងៃសុក្រសប្ដាហ៍មុន ដល់បេសកកម្មការទូតរបស់អាមេរិកទាំងអស់។ យ៉ាងណាក៏ដោយ លុះត្រាតែបេក្ខជនបំពេញតាមលក្ខណៈវិនិច្ឆ័យដ៏តូចចង្អៀតសម្រាប់ការលើកលែងបម្រាម មិនដូច្នេះទេ ពាក្យស្នើសុំទិដ្ឋាការរបស់បុគ្គលនោះនឹងត្រូវបដិសេធចាប់ពីថ្ងៃចន្ទនេះតទៅ។ អ្នកធ្វើដំណើរមានទិដ្ឋាការដែលចេញពីមុនរួចហើយ នៅតែអាចចូលសហរដ្ឋអាមេរិកបាន បើទោះបីជាបម្រាមចូលជាធរមានក៏ដោយ។

អ្នកជំនាញផ្នែកអន្តោប្រវេសន៍ជាច្រើននិយាយថា បម្រាមថ្មីនេះបង្កើតឡើងដើម្បីយកឈ្នះលើបញ្ហាប្រឈមពីតុលាការណាមួយ ដោយផ្តោតលើដំណើរការដាក់ពាក្យសុំទិដ្ឋាការ ហើយមើលទៅត្រូវបានរៀបចំយ៉ាងប្រយ័ត្នជាងក្រឹត្យដែលសរសេរដោយប្រញាប់ប្រញាល់ក្នុងអំឡុងពេលអាណត្តិដំបូងរបស់លោក Trump ដែលបដិសេធការចូលទៅកាន់ទឹកដីអាមេរិកលើពលរដ្ឋនៃប្រទេសមូស្លីមជាចម្បង៕