កងទ័ពអ៊ីស្រាអែល បាននិយាយកាលពីថ្ងៃអាទិត្យ ទី៨ មិថុនាថា ខ្លួនបានរកឃើញសាកសពរបស់មេបញ្ជាការយោធាក្រុមហាម៉ាសលោក Mohammed Sinwar នៅក្នុងផ្លូវរូងក្រោមដី ក្រោមមន្ទីរពេទ្យមួយនៅតំបន់ហ្កាហ្សាភាគខាងត្បូង បន្ទាប់ពីប្រតិបត្តិការដែលបានកំណត់គោលដៅ កាលពីខែមុន។

ឧត្តមសេនីយ Effie Defrin អ្នកនាំពាក្យរបស់កងកម្លាំងការពារអ៊ីស្រាអែល(IDF) បាននិយាយថា មេដឹកនាំជាន់ខ្ពស់របស់ក្រុមហាម៉ាសម្នាក់ទៀត គឺលោក Mohammad Shabana មេបញ្ជាការកងពលតូច ទីក្រុង Rafah ក៏ត្រូវបានរកឃើញស្លាប់នៅកន្លែងកើតហេតុ រួមជាមួយនឹងក្រុមសកម្មប្រយុទ្ធមួយចំនួនទៀត ដែលកំពុងត្រូវបានកំណត់អត្តសញ្ញាណ។ កងកម្លាំងអ៊ីស្រាអែល បានផ្តល់ឱ្យអ្នកសារព័ត៌មានបរទេសមួយក្រុមតូច ចូលទៅពិនិត្យមើលផ្លូវរូងក្រោមដី ដែលត្រូវបានរកឃើញនៅក្រោមមន្ទីរពេទ្យអ៊ឺរ៉ុបក្នុងទីក្រុង Khan Younis ដែលលោក Defrin បាននិយាយថា គឺជាទីបញ្ជាការធំ និងជាបរិវេណគ្រប់គ្រងដ៏សំខាន់សម្រាប់ក្រុមហាម៉ាស។

លោក Defrin និយាយថា «នេះគឺជាគំរូមួយផ្សេងទៀតនៃការប្រើប្រាស់ដ៏អាក្រក់របស់ក្រុមហាម៉ាស ដោយយកជនស៊ីវិលជាខែលការពារ និងបានប្រើប្រាស់ហេដ្ឋារចនាសម្ព័ន្ធស៊ីវិល មន្ទីរពេទ្យ ម្តងហើយម្តងទៀត»។ «យើងបានរកឃើញនៅក្រោមមន្ទីរពេទ្យ នៅក្រោមបន្ទប់សង្គ្រោះបន្ទាន់ ជាបរិវេណមានបន្ទប់មួយចំនួន។ នៅក្នុងបន្ទប់មួយក្នុងចំណោមនេះ យើងបានរកឃើញសាកសព លោក Mohammed Sinwar ដែលត្រូវបានសម្លាប់»។

នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រកាសពីការស្លាប់របស់លោក Sinwar កាលពីខែមុន ប៉ុន្តែលោក Defrin បាននិយាយថា ពេលនេះពួកគេមាន DNA របស់លោក ដែលបង្ហាញថា លើសពីការសង្ស័យ ថាសាកសពនេះគឺជាលោក Sinwar។ ក្រុមហាម៉ាស ពុំបានធ្វើអត្ថាធិប្បាយលើរបាយការណ៍អំពីការស្លាប់របស់ លោក Sinwar ឬ លោក Shabana ទេ។