យានយន្តយោធា ដែលត្រូវបានដឹកជញ្ជូនទៅកាន់ទីក្រុងវ៉ាស៊ីនតោនឌី.ស៊ី តាមរថភ្លើង ត្រូវបានទម្លាក់ចុះកាលពីថ្ងៃអាទិត្យ ទី៨ មិថុនា មុនពេលព្យុហយាត្រាខួបកងទ័ព នៅថ្ងៃទី១៤ ខែមិថុនា របស់ប្រធានាធិបតីសហរដ្ឋអាមេរិក លោក Donald Trump ។

ការប្រារព្ធពិធីដែលបានគ្រោងទុកជាយូរមក នៅក្នុងទីក្រុងវ៉ាស៊ីនតោនសម្រាប់ខួបលើកទី២៥០ របស់កងទ័ពសហរដ្ឋអាមេរិក នឹងស្របពេលជាមួយថ្ងៃខួបកំណើតគម្រប់៧៩ឆ្នាំរបស់លោក Trump។ ខណៈ កងទ័ពបាននិយាយថា ខ្លួនគ្មានផែនការដើម្បីទទួលស្គាល់ថ្ងៃកំណើតរបស់លោកTrump ទេ លោកប្រធានាធិបតី នឹងមានតួនាទីដ៏សំខាន់ក្នុងការប្រារព្ធពិធីដែលត្រូវបានកែប្រែ ដើម្បីរួមបញ្ចូលទៅក្នុងក្បួនព្យុហយាត្រា។

សហរដ្ឋអាមេរិក កំពុងនាំយកកងទ័ពចំនួន៦.៥០០នាក់ទៅកាន់ទីក្រុងវ៉ាស៊ីនតោន រួមជាមួយយានយន្តចំនួន១៥០គ្រឿង និងយន្តហោះចំនួន៥០គ្រឿង សម្រាប់ការប្រារព្ធពិធីនេះ។ យានយន្តទាំងនោះ កំពុងត្រូវបានបញ្ជូនទៅកាន់ទីក្រុងតាមរថភ្លើង និងរថយន្តដឹកទំនិញធំៗ ខណៈឧទ្ធម្ភាគចក្រនឹងហោះហើរចូលទៅ។

កងទ័ពបាននិយាយថា រថក្រោះ M1 Abrams ២៥គ្រឿង នឹងបង្ហាញនៅក្នុងក្បួនព្យុហយាតត្រា។ វាក៏នឹងរួមបញ្ចូលផងដែរនូវយានរថពាសដែក Stryker ចំនួន២៨គ្រឿង យានកាំភ្លើងផ្លោងចល័ត Paladin ចំនួន៤គ្រឿង និងកាំភ្លើងធំរួមមាន M777 និង M119 ផងដែរ។