អុកចត្រង្គ៖ ឯកឧត្តម គុជ គីមឡុង ប្រធានសហព័ន្ធកីឡាអុកចត្រង្គកម្ពុជា បានចាត់ទុកការប្រកួតជើងឯកថ្នាក់ជាតិគឺជាវេទិកាដ៏សំខាន់ ដើម្បីផលិតធនធានកីឡាករ-កីឡាការិនីឆ្នើមៗសម្រាប់ត្រៀមការប្រកួតអន្ដរជាតិនានា។ ការថ្លែងរបស់ប្រមុខសហព័ន្ធនេះ ធ្វើឡើងក្នុងពិធីបើកការប្រកួតកីឡាអុកចត្រង្គជ្រើសរើសជើងឯកថ្នាក់ជាតិឆ្នាំ២០២១ កាលពីថ្ងៃទី២២ ខែធ្នូម្សិលមិញ។
ឯកឧត្តមបន្ដថា ក្នុងផែនការយុទ្ធសាស្ដ្ររបស់សហព័ន្ធ ការប្រកួតជើងឯកថ្នាក់ជាតិគឺជាការប្រកួតដ៏ជាក់លាក់ លើសមរភូមិក្ដារអុកដោយប្រើទេពកោសល្យ វិធីសាស្ដ្ និងក្បួនយុទ្ទសាស្ដ្រផ្សេងៗដែលប្រជុំដោយកីឡាករ-កីឡាការិនីខ្លាំងៗ។ ដូច្នេះការប្រកួតនេះគឺជាឱកាសសម្រិតសម្រាំងធនធានកីឡាករ-កីឡាការិនីល្អៗ សម្រាប់ចូលរួមជាមួយក្រុមជម្រើសជាតិ និងការប្រកួតអន្ដរជាតិនានា។ ដោយហេតុនេះ លោក ប៉ែន វុទ្ធី អនុប្រធាននាយកដ្ឋានអប់រំកាយ និងកីឡាបានបង្ហញក្ដីរំពឹងថា ក្នុងការប្រកួតរយៈពេល ៤ថ្ងៃនេះ កីឡាករទាំងអស់នឹងខិតខំប្រឹងប្រែងប្រកួតអស់ពីសមត្ថភាព ទេពកោសល្យ និងបច្ចេកទេសរៀងៗខ្លួនដើម្បីទទួលបានជ័យជម្នះ និងសម្រាប់ជាគោលដៅចូលរួមហ្វឹកហាត់ក្នុងក្រុមជម្រើសជាតិ ក៏ដូចជាត្រៀមការប្រកួតអន្ដរជាតិនានា ពិសេសការប្រកួតកីឡាស៊ីហ្គេមឆ្នាំ២០២៣ នៅកម្ពុជា។
យោងតាមរបាយការណ៍របស់គណៈកម្មការរៀបចំការប្រកួត ព្រឹត្តិការណ៍ប្រចាំឆ្នាំនេះធ្វើឡើងរយៈពេល ៤ថ្ងៃចាប់ពីថ្ងៃទី២១ ដល់ថ្ងៃទី២៤ ខែធ្នូ ឆ្នាំ២០២១ នៅទីស្នាក់ការគណៈកម្មាធិការជាតិអូឡាំពិកកម្ពុជា ដោយមានកីឡាករ ៦៦នាក់មកពី ១៦ក្លិបដែលជាសមាជិកពេញសិទ្ធរបស់សហព័ន្ធចូលរួម៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
