ទិន្នន័យតាមដានការហោះហើរបានបង្ហាញថា យន្តហោះ Boeing ថ្មីប្រភេទ 737 MAX មួយគ្រឿង បានចុះចតនៅប្រទេសចិន នៅថ្ងៃចន្ទ (០៩ មិថុនា) នេះ ដែលជាសញ្ញាមួយថា ក្រុមហ៊ុនផលិតយន្តហោះអាមេរិក កំពុងបន្តដឹកជញ្ជូនដល់អតិថិជនចិនវិញជាថ្មីម្ដងទៀត ខណៈទីក្រុងប៉េកាំង និងក្រុងវ៉ាស៊ីនតោន បានបន្ធូរបន្ថយសង្គ្រាមពន្ធគយរបស់ភាគីទាំងពីរ។

ក្រុមហ៊ុន Boeing — ដែលបានបញ្ឈប់ការដឹកជញ្ជូនយន្តហោះថ្មីទៅកាន់ប្រទេសចិន កាលពីខែមេសា ដោយសារប្រទេសសេដ្ឋកិច្ចធំជាងគេបំផុតរបស់ពិភពលោកទាំងពីរបានបង្កើនពន្ធដាក់គ្នាទៅមក — បាននិយាយថា ចាប់ពីចុងខែឧសភា ការដឹកជញ្ជូននឹងបន្តឡើងវិញនៅក្នុងខែមិថុនា បន្ទាប់ពីពន្ធត្រូវបានកាត់បន្ថយជាបណ្តោះអាសន្នសម្រាប់រយៈពេល ៩០ថ្ងៃ។

យន្តហោះ ដែលមានឈ្មោះក្រុមហ៊ុនអាកាសចរណ៍ Xiamen Airlines នោះ បានចុះចតនៅមជ្ឈមណ្ឌលបញ្ចប់ការងារ Zhoushan របស់ Boeing ក្បែរមជ្ឈមណ្ឌលពាណិជ្ជកម្មនៃទីក្រុងសៀងហៃ បន្ទាប់ពីចាកចេញពីទីក្រុង Seattle សហរដ្ឋអាមេរិក កាលពីថ្ងៃសៅរ៍។ ចិនតំណាងឱ្យប្រហែល ១០% នៃពាណិជ្ជកម្មរបស់ Boeing ហើយជាទីផ្សារអាកាសចរណ៍ដ៏សំខាន់ និងកំពុងរីកចម្រើនក្នុងពិភពលោក៕