ក្រុមឧស្សាហកម្មដ៏ធំបំផុតមួយរបស់អាល្លឺម៉ង់ បានព្រមានថា ឧស្សាហកម្មដែកថែបរបស់អឺរ៉ុប ប្រឈមនឹងការបំផ្លិចបំផ្លាញឱ្យរលាយបាត់ ដោយសាររបាំងពន្ធ ៥០% របស់លោកប្រធានាធិបតីអាមេរិក Donald Trump ការចំណាយថ្លៃថាមពលខ្ពស់ និងផលិតផលដែកថែបតម្លៃថោកគរដូចភ្នំពីចិន។

លោកស្រី Ilse Henne សមាជិកក្រុមប្រឹក្សាភិបាលនៃក្រុមដែកថែប វិស្វកម្ម និងគីមី ThyssenKrupp របស់អាល្លឺម៉ង់ បាននិយាយថា ឧស្សាហកម្មនេះប្រឈមនឹងវិបត្តិអត្ថិភាព បន្ទាប់ពីការសម្រេចចិត្តរបស់មេដឹកនាំអាមេរិករូបនេះ កាលពីសប្តាហ៍មុន ក្នុងការដំឡើងពន្ធទ្វេដងលើការនាំចូលដែកថែប និងអាលុយមីញ៉ូមពីអត្រា ២៥% ពីមុនទៅដល់តួលេខ ៥០% បច្ចុប្បន្ន។

នៅពេលត្រូវសាកសួរនៅឯសន្និសីទមជ្ឈមណ្ឌលគោលនយោបាយអឺរ៉ុប ក្នុងទីក្រុងប្រ៊ុចសែល ទៅលើថា "តើមានការភ័យខ្លាចថាឧស្សាហកម្មនេះរលាយបាត់ ឬទេ" លោកស្រីឆ្លើយថា "រឿងនោះគឺពិតណាស់"។ លោកស្រី Henne បានព្រមានថា "ប្រសិនបើឧស្សាហកម្មដែកថែបនៅអឺរ៉ុប បាត់បង់ទៅពិតមែន នោះនឹងមានការខូចខាតទ្រង់ទ្រាយធំជាច្រើន"។

គួរឱ្យដឹងថា ដែកថែប និងអាលុយមីញ៉ូម គឺជាឧស្សាហកម្មមូលដ្ឋាន ដែលជាចំណុចស្នូលសំខាន់បំផុតនៃអ្វីៗគ្រប់យ៉ាង រាប់ចាប់ពីនាវាមុជទឹក យន្តហោះ និងរថយន្ត រហូតដល់ផលិតផលប្រចាំថ្ងៃដូចជា សម្ភារៈផ្ទះបាយចាំបាច់ ចានដែកអ៊ីណុក និងឧបករណ៍ប្រើប្រាស់សំខាន់ៗផ្សេងៗទៀត៕