បាល់ទាត់៖ ក្រុមសិង្ហបុរីបានបង្ហាញខ្លួនជាលើកដំបូងនៅវគ្គពាក់កណ្តាលផ្តាច់ព្រ័ត្រ AFF Championship រាប់ពីឆ្នាំ២០១២ ខណៈជើងទី១ ម្សិលមិញទល់នឹងឥណ្ឌូនេស៊ីបានត្រឹមស្មើគ្នា ១-១។ ក្រុមភ្ញៀវឥណ្ឌូនេស៊ីបានបើកការនាំមុខនៅនាទីទី២៨ ដោយ Witan Sulaeman មុនពេលដែលម្ចាស់ផ្ទះសិង្ហបុរីតាមស្មើវិញនៅវគ្គទី២ ដោយ Ikhsan Fandi។
ក្រោយចប់ការប្រកួតគ្រូបង្វឹកឥណ្ឌូនេស៊ីលោក Shin Tae-yong បានសំដែងអារម្មណ៍ខកចិត្តចំពោះលទ្ធផលស្មើគ្នានេះ ដោយលើកឡើងថា ក្រុមរបស់លោកធ្វើបានល្អនៅវគ្គទី១ តែវគ្គទី២ សិង្ហបុរីជាក្រុមមានប្រៀបទៅវិញ។ យ៉ាងណាក្តីលទ្ធផលក៏មិនអាក្រក់ពេកដែរ ក្រុមរបស់លោកនឹងរៀបចំឱ្យបានល្អជាងនេះនៅជើងទី២។ ចំនែកគ្រូបង្វឹកសិង្ហបុរីលោក Tatsuma Yoshida ឱ្យដឹងថា នេះជាលទ្ធផលអាចទទួលយកបានមិនល្អក៏មិនអាក្រក់ពេកដែរ តែច្បាស់ណាស់ថាជើងទី២ ជាការប្រកួតដ៏តានតឹងមួយ។ ក្រុមទាំងពីរនឹងជួបគ្នាជើងទី២ នៅថ្ងៃសៅរ៍ចុងសប្តាហ៍ដើម្បីសំរេចថាក្រុមណាឡើងវគ្គផ្តាច់ព្រ័ត្រ។ រំលឹកថា សិង្ហបុរីគឺជាក្រុមជើងឯកតំបន់អាស៊ាននេះ ៤លើកមកហើយដោយឈ្នះចុងក្រោយបំផុតតាំងពីឆ្នាំ២០១២ ហើយតាំងពីពេលនោះមកពួកគេមិនដែលឡើងវគ្គពាក់កណ្តាលផ្តាច់ព្រ័ត្រឡើយ៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
