តុលាការក្រុងសេអ៊ូល នៅថ្ងៃចន្ទ (ទី៩ ខែមិថុនា) នេះ បានប្រាប់ឲ្យដឹងថា ខ្លួននឹងពន្យារពេលការជំនុំជម្រះសំណុំរឿងរបស់លោកប្រធានាធិបតី Lee Jae-myung ដោយគ្មានកំណត់ ពាក់ព័ន្ធនឹងការចោទប្រកាន់រំលោភច្បាប់បោះឆ្នោតឆ្នាំ២០២២។

នៅមុនពេលលោក Lee ជាប់ឆ្នោត តុលាការកំពូលរបស់ប្រទេសកូរ៉េខាងត្បូង បានសម្រេចកាលពីខែឧសភាថា លោកបានបំពានច្បាប់បោះឆ្នោត ដោយធ្វើ «សេចក្តីថ្លែងការណ៍មិនពិត» ជាសាធារណៈ ក្នុងអំឡុងពេលប្រកួតប្រជែងតំណែងប្រធានាធិបតីឆ្នាំ២០២២ ហើយបានបញ្ជូនសំណុំរឿងនេះត្រឡប់ទៅតុលាការសាលាឧទ្ធរណ៍វិញ។

តុលាការកំពូលទីក្រុងសេអ៊ូល ដែលបានកំណត់ពេលសវនាការលើសំណុំរឿងនេះនៅថ្ងៃទី១៨ ខែមិថុនា បានប្រាប់ឲ្យដឹងនៅថ្ងៃទី៩ ខែមិថុនាថា ខ្លួននឹងពន្យារពេលសវនាការ ហើយលើកទៅសម្រេចនៅពេលក្រោយ ដោយមិនទាន់មានកាលបរិច្ឆេទជាក់លាក់នៅឡើយទេ។

ពាក់ព័ន្ធនឹងករណីនេះ ការិយាល័យរបស់លោក Lee មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ តុលាការបានបញ្ជាក់ថា ការសម្រេចពន្យារពេលសវនាការនេះ គឺយោងទៅ «រដ្ឋធម្មនុញ្ញមាត្រា ៨៤» តែមិនបានលម្អិតបន្ថែមឡើយ។

ទូរទស្សន៍ក្នុងស្រុក KBS បានរាយការណ៍នៅថ្ងៃទី៩ ខែមិថុនានេះថា គណបក្សប្រជាធិបតេយ្យដែលកំពុងកាន់អំណាចរបស់លោក Lee ដែលគ្រប់គ្រងសភា គ្រោងនឹងអនុម័តសេចក្ដីស្នើច្បាប់មួយ ក្នុងសប្តាហ៍នេះ ដែលផ្អាកការកាត់ក្តីដែលកំពុងបន្តមាន ចំពោះប្រធានាធិបតីកំពុងកាន់តំណែង៕