ក្រសួងការបរទេសចិន នៅថ្ងៃចន្ទ (ទី៩ ខែមិថុនា) នេះ បាននិយាយការពារការធ្វើនាវាចរណ៍របស់នាវាផ្ទុកយន្តហោះរបស់ខ្លួនថា «អនុវត្តស្របតាមច្បាប់អន្តរជាតិ» ទាំងស្រុង ជាការឆ្លើយតបទៅនឹងសេចក្តីថ្លែងការណ៍របស់ប្រទេសជប៉ុន ដែលថា នាវារបស់ប្រទេសចិនបានធ្វើដំណើរនៅក្នុងតំបន់សេដ្ឋកិច្ចផ្តាច់មុខ (EEZ) របស់ប្រទេសជប៉ុន។

នាព្រឹកថ្ងៃចន្ទនេះ អ្នកនាំពាក្យជាន់ខ្ពស់រដ្ឋាភិបាលរបស់ប្រទេសជប៉ុន បានប្រាប់ឲ្យដឹងថា នាវាផ្ទុកយន្តហោះចិន Liaoning បានធ្វើដំណើរឆ្លងកាត់ដែនទឹកភាគខាងកើតនៃកោះ Iwo Jima ក្នុងមហាសមុទ្រប៉ាស៊ីហ្វិក ជាលើកដំបូង។

សេចក្តីថ្លែងការណ៍មួយពីសេនាធិការចម្រុះរបស់ជប៉ុន កាលពីចុងសប្តាហ៍កន្លងមក បានលើកឡើងថា នាវា Liaoning អមដោយនាវាមួយចំនួនផ្សេងទៀត បានធ្វើនាវាចរណ៍នៅក្នុងសមុទ្រ ក្នុងរង្វង់តំបន់ EEZ របស់ប្រទេសជប៉ុន នៅជិតកោះ Minamitorishima ដែលជាកោះដាច់ស្រយាល នៅភាគខាងកើតនៃកោះ Iwo Jima។ ជប៉ុនក៏បានបញ្ជាក់ផងដែរថា យន្តហោះចម្បាំង និងឧទ្ធម្ភាគចក្រ បានហោះឡើង និងចុះចតនៅលើ Liaoning ក្នុងដែនទឹកភាគអាគ្នេយ៍នៃកោះ Iwo Jima កាលពីថ្ងៃអាទិត្យ។

យ៉ាងណាក្ដី អំឡុងសន្និសីទសារព័ត៌មានប្រចាំថ្ងៃ នៅទីក្រុងប៉េកាំង អ្នកនាំពាក្យក្រសួងការបរទេសចិន លោក Lin Jian បាននិយាយថា៖ «ប្រទេសចិនតែងតែអនុវត្តគោលនយោបាយការពារជាតិ ដែលជាវិធានការពារខ្លួន។ សង្ឃឹមថា ភាគីជប៉ុននឹងពិនិត្យមើលបញ្ហានេះ ដោយចេតនាត្រឹមត្រូវ និងសមហេតុផល»៕