សមាជិកនាវិក ៤នាក់ កំពុងបាត់ខ្លួន បន្ទាប់ពីមានអគ្គិភ័យនៅលើនាវាកុងតឺន័រចុះបញ្ជី ក្នុងប្រទេសសិង្ហបុរី ដោយហេតុការណ៍នេះ កើតឡើងនៅឯម្ដុំឆ្នេររបស់ប្រទេសឥណ្ឌា នាថ្ងៃចន្ទ (ទី៩ ខែមិថុនា)។

អាជ្ញាធរដែនសមុទ្រ និងកំពង់ផែសិង្ហបុរី (MPA) បានប្រាប់ឲ្យដឹងថា អគ្គិភ័យនេះ បានមាននៅម៉ោងប្រហែល ១២:៣០នាទី ក្រោយថ្ងៃត្រង់ ខណៈដែលនាវា Wan Hai 503 ស្ថិតនៅចម្ងាយប្រហែល ៨០គីឡូម៉ែត្រ នៅភាគនិរតីនៃទីក្រុង Azhikkal ក្នុងរដ្ឋ Kerala ប្រទេសឥណ្ឌា។ មានសមាជិកនាវិក ២២នាក់នៅលើនាវានោះ។

អមដោយការបន្ថែមថា មានសេចក្ដីរាយការណ៍ពីការរងរបួសដែរនោះ MPA បានបញ្ជាក់ថា «សមាជិកនាវិកចំនួន ១៨នាក់ ត្រូវបានជួយសង្គ្រោះ ហើយកំពុងត្រូវបានផ្ទេរពីទូកសង្គ្រោះទៅកាន់នាវាឆ្លងកាត់ក្បែរនោះ។ មិនមានជនជាតិសិង្ហបុរីនៅលើនាវានោះទេ»។

MPA បានឲ្យដឹងទៀតថា ឆ្មាំល្បាតឆ្នេរ និងកងទ័ពជើងទឹកឥណ្ឌា កំពុងផ្តល់ជំនួយដល់នាវិក ក៏ដូចជាធ្វើប្រតិបត្តិការស្វែងរក និងជួយសង្គ្រោះ សម្រាប់អ្នកបាត់ខ្លួន។ នាវាកុងតឺន័រនេះគ្រប់គ្រងដោយក្រុមហ៊ុន Wan Hai Lines (សិង្ហបុរី)៕