អំឡុងពេលផ្ដល់បទសម្ភាសន៍ក្រៅប្រទេសលើកដំបូងរបស់លោក ប្រធានាធិបតីប៉ូឡូញទើបជាប់ឆ្នោតថ្មី គឺលោក Karol Nawrocki បានប្រាប់ទស្សនាវដ្តីហុងគ្រីថា ប្រទេសហុងគ្រី គឺជាដៃគូដ៏សំខាន់ សម្រាប់ប្រទេសប៉ូឡូញ ដោយបន្ថែមថា លោកនឹងកសាងកិច្ចសហប្រតិបត្តិការ នៅក្នុងតំបន់ តាមរយៈក្រុម Visegrad។

គួរដឹងថា ក្រុម Visegrad ដែលរួមមានប៉ូឡូញ ហុងគ្រី ស្លូវ៉ាគី និងសាធារណៈរដ្ឋឆេក បានបាត់បង់ឥទ្ធិពល បន្ទាប់ពីក្រុមចម្រុះសេរីនិយមរបស់លោកនាយករដ្ឋមន្ត្រី Donald Tusk បានឡើងកាន់អំណាចនៅឆ្នាំ២០២៣ ជំនួសក្រុមជាតិនិយម គឺគណបក្សច្បាប់ និងយុត្តិធម៌ (PiS) ដែលមានទំនាក់ទំនងយ៉ាងជិតស្និទ្ធជាមួយនាយករដ្ឋមន្ត្រីហុងគ្រី លោក Viktor Orban។

អ្នករិះគន់អឺរ៉ុប លោក Nawrocki បានឈ្នះការបោះឆ្នោតជ្រើសរើសប្រធានាធិបតីប៉ូឡូញ ក្នុងខែនេះ ដោយផ្តល់នូវផលប៉ះពាល់ដ៏ធំមួយដល់កិច្ចប្រឹងប្រែងរបស់រដ្ឋាភិបាលកណ្តាលនិយមរបស់លោក Donald Tusk ដើម្បីពង្រឹងទិសដៅគាំទ្រអឺរ៉ុបរបស់ទីក្រុងវ៉ាសូវី។

កាលពីថ្ងៃសុក្រចុងសប្ដាហ៍កន្លងមក លោក Orban បាននិយាយថា ជ័យជម្នះរបស់លោក Nawrocki គឺ «លទ្ធផលល្អប្រសើរណាស់» ដោយសាទរដល់ជោគជ័យរបស់សម្ព័ន្ធមិត្តនៃប្រធានាធិបតីអាមេរិក លោក Donald Trump។

ក្នុងបទសម្ភាសន៍នោះ លោក Nawrocki បានប្រាប់សារព័ត៌មានហុងគ្រី Mandiner ថា៖ «ប្រទេសហុងគ្រីគឺជាដៃគូដ៏សំខាន់ សម្រាប់ប៉ូឡូញ។ យើងកំពុងប្រឈមនឹងការងារធ្ងន់ធ្ងរ ដូចជាការកសាងក្រុម Visegrad ដែលនឹងក្លាយជាទម្រង់ដ៏សំខាន់ សម្រាប់ខ្ញុំ ក៏ដូចជាការពង្រឹង (សម្ព័ន្ធភាពយោធា) ព្រំដែនខាងកើតរបស់អង្គការណាតូ និងក្រុម Bucharest Nine»។

លោកបានបន្ថែមថា៖ «ខ្ញុំពិតជាមានបំណងចង់ជួបលោកនាយករដ្ឋមន្ត្រី Viktor Orban ដែលជាអ្នកនយោបាយដ៏មានប្រសិទ្ធភាពមួយរូប ដូចដែលត្រូវបានបង្ហាញក្នុងលទ្ធផលបោះឆ្នោតម្តងហើយម្តងទៀតរបស់លោក នៅប្រទេសហុងគ្រី។ ហើយខ្ញុំពឹងផ្អែកលើការមានកិច្ចសហប្រតិបត្តិការដ៏ល្អជាមួយលោក ក៏ដូចជាប្រទេសដទៃទៀតដែរ ដើម្បីផលប្រយោជន៍ក្នុងតំបន់»៕