អ្នកនាំពាក្យក្រសួងការពារជាតិ លោក Jiang Bin នៅថ្ងៃចន្ទ (ទី៩ ខែមិថុនា) នេះ បានប្រាប់ឲ្យដឹងថា កងទ័ពរំដោះប្រជាជនចិន (PLA) មានទំនុកចិត្តក្នុងការយកឈ្នះលើចលនាផ្ដាច់ខ្លួនរបស់កោះតៃវ៉ាន់ និងការជ្រៀតជ្រែកពីខាងក្រៅ។

ការអត្ថាធិប្បាយរបស់លោក Jiang បានកើតឡើងបន្ទាប់ពីមានរបាយការណ៍ ដែលថា សហរដ្ឋអាមេរិកកំពុងដឹកជញ្ជូនក្រុមថ្មីនៃរថក្រោះ M1A2 ទៅកាន់កោះតៃវ៉ាន់ ហើយគ្រោងនឹងបង្កើនការលក់អាវុធរបស់ខ្លួនទៅកាន់ឲ្យកោះតៃវ៉ាន់ច្រើនឡើងៗ ក្នុងរយៈពេល ៤ឆ្នាំខាងមុខ។

បើតាមការប៉ាន់ប្រមាណរបស់របាយការណ៍នោះ បានឲ្យដឹងថា ការលក់អាវុធថ្មីអាចមានកម្រិតលើសអាណត្តិដំបូងរបស់រដ្ឋបាលលោក Donald Trump។ ហើយបើយោងតាមរបាយការណ៍ដដែលនោះ បានឲ្យដឹងទៀតថា លើសពីនោះទៀត អតីតមន្ត្រីយោធាអាមេរិកម្នាក់ បានបង្ហើបថា បុគ្គលិកយោធាអាមេរិកប្រមាណ ៥០០នាក់ កំពុងប្រតិបត្តិការ នៅកោះតៃវ៉ាន់ ដែលលើស ១០ដងនៃចំនួនដែលត្រូវបានបង្ហាញដោយសភាអាមេរិក កាលពីមុន។

លោក Jiang បាននិយាយថា៖ «បញ្ហាកោះតៃវ៉ាន់ គឺជាស្នូលនៃផលប្រយោជន៍ស្នូលរបស់ប្រទេសចិន ហើយជាបន្ទាត់ក្រហមដំបូងដែលមិនត្រូវបានឆ្លងកាត់ ក្នុងទំនាក់ទំនងចិន-អាមេរិក។ យើងជំរុញឲ្យភាគីអាមេរិកបញ្ឈប់ការឃុបឃិតគ្នាផ្នែកយោធាជាមួយកោះតៃវ៉ាន់ ក្នុងគ្រប់រូបភាព។ បើមិនដូច្នេះទេ វានឹងធ្វើឲ្យមានកំហុសឆ្គង ហើយបង្កគ្រោះថ្នាក់ច្រើនជាងផលល្អ»។ 

លោកបានសង្កត់ធ្ងន់ថា៖ «យើងព្រមានដល់អាជ្ញាធរ DPP (គណបក្សប្រជាធិបតេយ្យជឿនលឿន) ថា ការគាំទ្រអាវុធពីអាមេរិក មិនអាចជួយពួកគេបានទេ។ PLA នឹងបន្តពង្រឹងការហ្វឹកហ្វឺនផ្នែកយោធា និងការត្រៀមខ្លួនប្រយុទ្ធ ហើយនឹងពង្រឹងសមត្ថភាពរបស់ខ្លួន ក្នុងការប្រយុទ្ធ និងយកឈ្នះ។ យើងនឹងចាត់វិធានការយ៉ាងម៉ឺងម៉ាត់ ដើម្បីកម្ចាត់សកម្មភាពផ្ដាច់ខ្លួនរបស់កោះតៃវ៉ាន់ និងការជ្រៀតជ្រែកពីខាងក្រៅ»៕