ភាពអសណ្តាប់ធ្នាប់សាធារណៈបានផ្ទុះឡើងនៅកណ្តាលតំបន់ប្រជុំជន Ballymena ក្នុងដែនដីអៀរឡង់ខាងជើង របស់ចក្រភពអង់គ្លេស បន្ទាប់ពីការតវ៉ាមួយដែលត្រូវរាយការណ៍ថាកើតឡើងដោយសារតែការចោទប្រកាន់ពីបទរំលោភផ្លូវភេទ កាលពីថ្ងៃចន្ទ (០៩ មិថុនា) ហើយនគរបាលបាននិយាយថា មានវត្ថុជាច្រើនត្រូវបានគប់យ៉ាងហិង្សាដាក់លើក្រុមមន្រ្តី។

សេចក្តីថ្លែងការណ៍របស់នគរបាលបាននិយាយថា ភាពចលាចលនោះកើតឡើងបន្ទាប់ពីបាតុកម្មមួយនៅក្នុងតំបន់ ដែលមានចម្ងាយប្រហែល ៤៥គីឡូម៉ែត្រ ពីទីក្រុង Belfast នៅព្រឹកថ្ងៃចន្ទ ដោយបន្ថែមថា ការខូចខាតត្រូវបានរាយការណ៍ថាកើតមានលើទ្រព្យសម្បត្តិមួយចំនួន។

រូបភាពដែលត្រូវរាយការណ៍តាមប្រព័ន្ធផ្សព្វផ្សាយសង្គម បង្ហាញពីភាពគ្មានសណ្ដាប់ធ្នាប់យ៉ាងអាក្រក់ ដោយមានភ្នក់ភ្លើងតូចៗត្រូវបានបញ្ឆេះនៅជិតអ្វីដែលមើលទៅដូចជាអគារលំនៅដ្ឋាន ខណៈមានវត្តមាននគរបាល នៅកន្លែងកើតហេតុ។ វីដេអូឃ្លីបមួយទៀត បានបង្ហាញឱ្យឃើញបុរសពាក់ម៉ាស់ម្នាក់ បានគប់វត្ថុមួយដាក់លើរថយន្តនគរបាល ស្របពេលហ្វូងមនុស្សកំពុងសម្លឹងមើលភាពវឹកវរនោះ។

សារព័ត៌មាន BBC បានរាយការណ៍ថា ក្រុមបាតុកររាប់រយនាក់បានប្រមូលផ្តុំគ្នានៅទីប្រជជន Ballymena ក្នុងការឆ្លើយតបទៅនឹងសំណុំរឿងដែលពាក់ព័ន្ធនឹងក្មេងប្រុសជំទង់ពីរនាក់ ដែលបង្ហាញខ្លួននៅចំពោះមុខតុលាការកាលពីព្រឹកថ្ងៃចន្ទ ដោយពួកគេរងការចោទប្រកាន់ពីបទរំលោភសេពសន្ថវៈលើក្មេងស្រីវ័យជំទង់ម្នាក់នៅក្នុងក្រុង County Antrim៕